Uthishanhloko uboshwe kwelokubulala
BAPHENDUKE umhlambi kazalusile othisha nabafundi besikole iGasa High oLundi ngemuva kokuboshwa kukathishanhloko osolwa ngokubulala iphoyisa nokuzama ukubulala usomatekisi.
UMnuz Mlungisi Gasa (33) kulindeleke ukuba acele ibheyili ngoLwesine enkantolo yeMantshi eVryheid.
UGasa noMnuz Vilakazi (32), igama elingatholakalanga, basolwa ngokubulala uConstable Fana Cebekhulu (34) nokuzama ukubulala uMnuz “Mlungu” Zakwe (54).
UCebekhulu owayesebenza esiteshini saKwaNongoma wadutshulwa ngenyanga edlule egitsheliswe nguZakwe emotweni kanti bazohlaselwa.
Okhulumela amaphoyisa KwaZulu-Natal, uColonel Thembeka Mbhele, uthe bobabili bagcinwe ezitokisini.
“Kwaboshwa abasolwa ababili abaneminyaka ewu-32 no-33. Bavela enkantolo, icala lahlehliselwa uLwesine ukuze befake isicelo sebheyili,” kusho uMbhele.
Isolezwe lithole ukuthi kwakusetshenziswa imoto kaGasa ngelanga okwahlaselwa ngalo.
UGasa kuthiwa akayena usomatekisi kodwa kunomfowabo owayenetekisi eyodwa kule ndawo kodwa wagcina eyidayisile.
Kuthintwa okhulumela uMnyango wezeMfundo esifundazweni, uMnuz Sihle Mlotshwa, mayelana nesimo sesikole nokuboshwa kukathishanhloko uthe banalo ulwazi ngalesi simo. “UMnyango uzothumela umuntu ozoya kobhekelela isikole njengoba kunecala elikhona. Kukhona nophenyo lwethu esizolwenza sihlangene nesigungu sabazali kodwa ngokunye sizodedela inkantolo yenze umsebenzi wayo,” kusho uMlotshwa. Izolo uZakwe utshele Isolezwe ukuthi uyajabula kakhulu ngababoshiwe, wathi uyathemba ubulungiswa buzokwenziwa. “Namanje ngisekubhaceni ngoba angazi ukuthi ngiphephe kangakanani. Angazi noma ngizokwazi yini ukuya ecaleni ngoLwesine,” kusho u Zwakwe. Laba babehamba ngeveni yalo somatekisi. Iphoyisa lacela ukuba aligibelise ngoba bahlala ngandawonye.
Ngesikhathi bemi ezimpambanweni zomgwaqo, kwaqhamuka amadoda amathathu avulela ngenhlamvu.
UZakwe washayela imoto yakhe waze wangena esiteshini samaphoyisa oLundi amadoda elokhu ebalandela ngenhlamvu.
Kukhona owayehamba emgwaqweni naye owadubuleka, waphuthunyiswa esibhedlela.
UZakwe wadubuleka emlenzeni yomibili, ngezansi kwesibele nasengalweni.
Uthe useluleme. Ngemuva kokuhlaselwa waveza ukuthi kwakuhloswe yena, iphoyisa ladubuleka ngephutha.
Lokhu wathi ukusho ngoba kulo nyaka okwesithathu edutshulwa kodwa esinda.