Wesekwa nguSotswebhu uRamaphosa
USOTSWEBHU we-ANC ePhalamende, uMnuz Jackson Mthembu, usephumele obala wathi izinsolo zocansi ezibhekiswe kwiPhini likaMengameli uMnuz Cyril Ramaphosa, yimpi nje yezepolitiki.
UMthembu ubhale ku-twitter wakhe wathi umbiko ophume kwabezindaba ngeSonto othi uRamaphosa uthandana nabesifazane abehlukene abasebancane yimizamo yokuphazamisa umkhankaso wakhe njengoba egaqele isikhundla sokuba ngumengameli.
“Ngiyazwelana nenkosikazi nomndeni kaRamaphosa, bahlukumezekile ngenxa yalobu buzimu bepolitiki,” kubhala uMthembu ku-twitter.
UMthembu uthe uyazwelana futhi nabesifazane abasaphazwe kwabezindaba kwathiwa bathandana noRamaphosa.
“URamaphosa ushayelwa ukuzibophezela kwakhe ekuhlengeni i-ANC nohulumeni ezinkingeni obhekene nazo, okubalwa kuzo ukuthathwa kwamandla ombuso nenkohlakalo,” kusho uMthembu.
Uthe uRamaphosa usephenduke isitha kulabo abathintekayo ekulawulweni kombuso yidlanzana.
UMthembu uthe uzoqhubeka nokweseka uRamaphosa emkhankasweni wakhe wokuba ngumengameli we-ANC wengeza ngokuthi noma angangcoliswa kanjani lokho ngeke kuze kumshintshe umqondo.
URamaphosa eziphendulela uvumile ukuthi uyazana nabanye besifazane okukhulunywa ngabo kodwa waphika ukuthi ujola nabo.
Uthe yena nenkosikazi yakhe basiza abesifazane abaningi abafunda emanyuvesi ehlukene ngezimali.
URamaphosa uhluleke wancama wukuvimba i-Sunday Independent, okuyiyo evuse inyamazane, ukuthi ingalushicileli udaba olumhlambalazayo.
Esitatimendeni esithunyelelwe abezindaba, uRamaphosa uthe ziyamkhathaza izinsolo ezithi udiza ngemali kwabesifazane okuthiwa uthandana nabo.