I-DA idlala ngesikhathi ngesiphakamiso sokhetho
NJENGOBA namhlanje kudingidwa isiphakamiso se-DA ePhalamende sokuthi kusheshe kube nokhetho lukazwelonke kungaze kulindwe u-2019, abahlaziyi bathi isiphakamiso ngeke siphumelele, i-DA idlala ngesikhathi.
Abahlaziyi bathi njengoba kwahluleka ivoti eliyimfihlo lokukhipha uMengameli Jacob Zuma esikhundleni, nesiphakamiso ngeke siphase.
UMnuz Thabani Khumalo, umhlaziyi wezepolitiki, uthe ngisho amaqembu aphikisayo ahlukene phakathi ngesiphakamiso ngakho ngeke siphase.
“Amaqembu ahluleka ukukhipha i-ANC ngevoti ngakho lesi sokusheshe kubizwe ukhetho sizohluleka futhi. I-DA idlala ngesikhathi ngoba iyazi ngeke siphumelele isiphakamiso sayo. Yenza izaba nje zokuthi isaqhubeka nokufuna ukukhipha i-ANC emandleni,” kusho uKhumalo.
UMnuz Lukhona Mnguni, wenyuvesi yaKwaZulu-Natal, uthe umnyakazo we-DA ngeke uphumelele ngoba maningi amaqembu azolahlekelwa wukwesekwa uma kuhlakazwa iPhalamende.
Uthe amanye amaqembu afana ne-NFP, Agang, APC angashabalala uma kuba nokhetho. “Phakathi kwamaqembu angalahlekelwa yizihlalo ePhalamende kubalwa nayo i-ANC. Njengoba yathola u-62% okhethweni olwedlule uma ngase kubizwe lolu khetho mhlawumbe ingathola u-57% okusho ukuthi amanye amalungu ngeke esabuyela ePhalamende.”
Uthe amaqembu angathola ukwesekwa uma kubizwa lolu khetho i-DA, EFF, IFP ne-UDM.
“Njengoba i-DA yenza yonke le mizamo amanye amalungu ayo angagcina ecikeka bese eyishiya. Uma ubheka amanye amalungu asolwa ngokuvota namaqembu aphikisayo ngenyanga edlule, okubalwa kuwonoMakhosi Khoza (Dkt) kuFacebook ukubeka kucace ukuthi ngeke bavumelane nesiphakamiso se-DA.”
“I-DA wosomathuba, iyazi i-ANC intekenteke ingakho ifuna ukubuyisela umbuso wabamhlophe ngemizamo yokuthi kube nokhetho. Asikwazi ukuvotela ukukhipha i-ANC emandleni kodwa sifuna ukuqeda inkohlakalo,” kusho uDkt Khoza kuFacebook wakhe.