Asiqine isandla kubantu abaqola iSassa imali
UKUVELA kwezindaba zokuthi kuno-R600 million oholela izipoki kuwubufakazi bokuthi inkohlakalo eshayisa ngovalo idla lubi emahhovisi eSassa KwaZulu-Natal.
IKwaZulu-Natal yisona sifundazwe esiholela abantu abaningi nokwenza ihehe izigebengu ezikhwabanisa imali kahulumeni.
Abenza lobu bugebengu basizwa ngabasebenzi bangaphakathi kwaSassa nalabo abahola impesheni.
Umphathi weSassa obambile KwaZuluNatal nosanda kungena esikhundleni, uMnuz Sibusiso Nhlangothi, uthi uzimisele ukukhuculula inkohlakalo enukayo KwaZuluNatal.
Inkohlakalo iholela ekutheni iSassa ibe nesikweletu esikhulu ngenxa yokuthi uma bebanjwa abahola impesheni ngobugebengu bajika bangabi nayo imali yokukhokha imali esuke bekade beyihola igcine isiyisikweletu seSassa.
Lobu bugebengu kuthiwa bande kakhulu kulabo abahola isibonelelo sokondla izingane, kuze kuvele ukuthi ingane eyodwa ingaholelwa abantu abayisithupha.
Kungagcini lapho, esikhundleni sokuthi ihole u-R380 iyodwa kodwa kukhwabaniswe kugcine isihola u-R3 800.
Labo abahola isibonelelo ngobugebengu kusobala ukuthi ngabantu abangenanembeza futhi okungabafanele nokuthi ngabe bayayihola le mali.
Babuyisela uhulumeni emuva, bheka nje ngoba u-R600 million KwaZulu-Natal ungenza umsebenzi omkhulu kabi uguqule nempilo yabanye abantu.
Simfisela inhlanhla futhi siyamkhuthaza uNhlangothi emkhankasweni wakhe wokukhuculula inkohlakalo esikhathazile, kuboshwe abasebenzi abahlangene nezigebengu ekuqoleni uhulumeni izizumbulu.
Njengoba ethe kunophenyo oseluya emaphethelweni ngenkohlakalo eyenziwa ngabasebenzi beSassa, sengathi bangabanjwa impela babhekane nengalo yomthetho bese bethola isigwebo esinzima.