‘UBilliat usekulungele ukuyodlala phesheya’
UMQEQESHI weMamelodi Sundowns, uPitso “Jingles” Mosimane, ucacise ngekusasa likaKhama Billiat okuvela ukuthi akaseneme kuBafana Ba Style.
Inkontileka kaBilliat iyaphela ngoJuni. ISundowns isimnikile isicelo sayo ukuze ayelule kodwa lo mdlali odabuka eZimbabwe akakayisayini.
NgoJanuwari uBilliat uzobe esenelungelo lokusayina inkontileka yesibambiso neqembu elimfunayo noma alithandayo. I-Al Nassr FC yaseSaudi Arabia isifakile isicelo sokusayinisa uBilliat njengoba bevule iwindi lokudayiselana ngabadlali.
UMosimane ocija iSundowns ukusho kwagcwala umlomo ukuthi uBilliat usekulungele ukuyodlala phesheya kodwa lokho akusho ukuthi sekufanele bamdedele kalula.
“Njengamanje yisikhathi esihle sokuthi uKhama ayodlala phesheya kwezilwandle. UKeagan Dolly wahamba kanjani ukuyodlala eFrance? Umdlali uhamba kanjani vele? Yikuphi okumele kwenzeke uma enenkontileka neqembu? Wenzenjani wena njengomqeqeshi? Unqamula inkontileka uthi kuyena hamba ngoba usuwenzile umsebenzi?
“Akusho ukuthi kumele uvele umdedele umdlali wakho obalulekile owakhipha imali umthenga ngoba nakhu uthi usekulungele ukuyodlala phesheya. Kumele wenze ibhizinisi njengeqembu. Ngakho kumele kuxoxwe ukuze kwenziwe ibhizinisi,” kusho uMosimane.
NgoLwesihlanu udlalile uBilliat ngesikhathi iSundowns idlala umdlalo wesihle nePolokwane City. Ufike ezidlalela i-hip hop ehamba ngemoto yakhe enkulu i-Infiniti.
“Ngikhulumile noKhama ngamtshela ukuthi: uma ungadlala ngendlela owadlala ngayo ngesikhathi uqoqa imiklomelo yePremier Soccer League angingabazi ukuthi wonke amaqembu akufunayo azoyikhipha imali efunwa yiqembu. Ngimtshelile ukuthi kumele adlale ngaleya ndlela. Ngiyazi ukuthi angadlala ngayo. No-Alexi Sanchez kwi-Arsenal ubenazo izicelo futhi esekulungele ukuhamba. Useyenzele okuningi i-Arsenal kodwa ayizange imdedele ngoba bezingekho izicelo ezijabulisa izikhulu zeqembu.
“Usengahamba. Ubani ofuna ukulinda izinyanga eziyisithupha? Uma ufuna ukusayinisa uKhama uyiqembu langaphandle ungamthola mahhala ngemuva kukaJanuwari. Uzothi uyalinda ufike esethengiwe ngemuva kokuJanuwari. Uzosala uncela izithupha uzitshela ukuthi ubuzomthola mahhala. Ibhola ngomunye umdlalo. Nibonile indaba kaRivaldo Coetzee iphothulwe ngosuku lokugcina? Ngakho uma befuna ukulinda abalinde ke,” kusho uMosimane.
UBilliat ufike kwiSundowns ngo-2013 esuka kwi-Ajax Cape Town. Kuleli qembu usenqobe izicoco ezimbili ze-Absa Premiership, eseTelkom Knockout, Nedbank Cup, CAF Champions League neseCAF Super Cup.
“Ngiyazazi lezi zinto. Sengibe sebholeni isikhathi eside. Yingakho nami ngingazange ngilinde ngoRivaldo. Kungcono umthole manje esafuna ukuhamba. Thina simthole ngesikhathi esifanele,” kusho uMosimane.