Umkhuba ohlatshwa nguMashaba
UGXEKE umkhuba omubi wabadlali baseNingizimu Afrika wokubukela phansi amazwe athathwa njengamancane u-Ephriam “Shakes” Mashaba owayecija iBafana Bafana.
UMashaba watholela iBafana amaphuzu amane emidlalweni yokuqala yokuhlungela ukuzibekisela indawo kwiNdebe yoMhlaba eseRussia ngonyaka ozayo.
Ngempelasonto iBafana ithelwe othulini yiCape Verde ngo 2-1 ekuhambeni emdlalweni wokuhlunga. Namuhla ngo-7 ebusuku izodudulana neCape Verde eMoses Mabhida Stadium, eThekwini komunye umdlalo wokuhlungela ukuzibekisela indawo kwiNdebe yoMhlaba.
UMashaba obekhuluma nezintatheli ngemuva komdlalo weNedbank Cup Ke Yona Challenge, ukhale ngomqondo obhedayo wabadlali baseNingizimu Afrika ababukela phansi amanye amazwe.
“Ngidumele. Njengomuntu waseNingizimu Afrika ngiphatheka kabi uma iqembu lingenzanga kahle. Uma kudlala iqembu lesizwe ngihlale ngilifisela okuhle. Ngiyethemba ukuthi kuzoshaya uLwesibili (namuhla) sesiwalungisile amaphutha.
“Kumele sinqobe ngoLwesibili ukuze sibuyele endaweni efanele. Sinalo ithuba lokuzibekisela indawo kwiNdebe yoMhlaba. Abadlali bethu uma befuna ukudlala bangayithola imiphumela edingekayo emidlalweni elandelayo. Yindlela vele esihlale sicabanga ngayo njengabantu baseNingizimu Afrika uma sidlala nala mazwe okuthiwa mancane. Sibukelana phansi eNingizimu Afrika. Thina silinyusa kakhulu izinga uma sibhekene neNigeria neCameroon. Uma sibhekene noBurkina Faso namanye amazwe sivele sithi obani laba? Sicabanga ukuthi sizobadla kalula bese beyasimangaza,” kusho uMashaba.
IBafana ifuna ukuqeda ishobolo leminyaka ihluleka wukuzibekisela indawo kwiNdebe yoMhlaba. Elakuleli lagcina ukudlala kwiNdebe yoMhlaba ngezithukuthuku zalo ngo-2002 eJapan/Korea.
“Angazi siyithathela kuphi le nto yokweya amanye amazwe. Kumele siwuyeke lo mkhuba omubi kanje. Ngemizuzu engu-20 yokuqala bekumele ngabe sihambe phambili ngo 3-0 kodwa sabayeka baze babuyelwa wukuzethemba. Abazange bashaye amagoli amahle. Elokuqala kube yiphenathi kwathi elinye kwaba yiphutha lethu. Emidlalweni yokuhlunga kumele wenze isiqiniseko sokuthi uwina imidlalo yakho yasekhaya. Yonke imidlalo ifana nowafa wafa kithina njengamanje. Akumele sicabange ngokudlala ngokulingana,” kusho uMashaba.