IKaizer Chiefs ifuna uCastro mahhala
IKAIZER Chiefs ifuna ukumthola bhusende umgadli weMamelodi Sundowns, uLeonard Castro.
Isolezwe lihabule izindaba zokuthi uBobby Motaung, imenenja yeqembu, uyazifela ngoCastro kodwa umqeqeshi weqembu, uSteve Komphela, akayizwa kahle indaba yakhe.
“UBobby nguyena othanda kakhulu uCastro. ISundowns ibizimisele ngokumdedela kodwa iChiefs yesaba ukukhipha imali. UCastro ubhaliswe ngosuku lokugcina kwiPremier Soccer League. ISundowns ibifuna ukumdedela ngemali enhle,” kusho umthombo.
UCastro uke wanikwa ikhefu eliyisipesheli ngenxa yokuthi inkosikazi wakhe ibisanda kubeletha. Inkontileka kaCastro neSundowns iyaphela ngoJuni. NgoJanuwari uzobe esenalo ilungelo lokusayina neqembu alithandayo njengoba kuzobe sekusele izinyanga eziyisithupha kwinkontileka.
Kuthintwa uThulani Thuswa wezokuxhumana kwiSundowns uthe: “UCastro ungumdlali weSundowns. Ngicela sigxile kulokho. Ngoba njengoba ehlezi kuchaza kona ukuthi usaneme kuSundowns.”
NgoLwesihlanu iChiefs ikhiphe isitatimende lapho ebiveza khona ukuthi iyaqhubeka nokuthungatha umgadli. Njengamanje iChiefs ibophele uBernard Parker noGustavo Paez phambili. Kukhona nomfana omncane uRyan Moon kanti u-Emmanuel Letlotlo osanda kukhushulelwa eqenjini elikhulu ulimele.
Amakhosi adedele inqwaba yabadlali abebengayenzeli lutho ekupheleni kwesizini edlule. Idedele uCamaldine Abraw, Edward Manqele, Siphelele Mthembu, Michelle Katsvairo noLewis Macha.
Emasontweni edlule iChiefs ike yahlola abagadli abahlukahlukene. Iqale yahlola uJonathan Phillipe, odabuka e-Argentina. Ngemuva kwalokho yabuya yahlola umgadli waseNigeria u-Okiki Afolabi.
Bobabili laba bagadli abazange bamchaze uKomphela ngakho wanquma ukungabasayinisi nakube bekuvulwe iwindi lokuhwebelana ngabadlali. Kuthintwa uVina Maphosa wezokuxhumana kwiChiefs uthe: “Asikaze sifune ukusayinisa uCastro. Mina nginohla lwabadlali esibasayinisile. Bakhona engaziyo ukuthi besibafuna kodwa uCastro ubengekho kulolo luhla.”