Ugaqele indebe unozinti weTeam of Choice
UNOZINTI weMaritzburg United, uBongani Mpandle, akazimisele ukuba ngomunye walabo “ababunela” ebhetshini emaqenjini e-Absa Premiership.
UMpandle, ojoyine iTeam of Choice maphakathi nesizini edlule, ubukeka esephumelele ukuyenza eyakhe indawo ezintini kusukela kuqale eka2017/2018. Usavimbe kuyona yomithathu imidlalo, okungemibili yePremiership nowomlenze wokuqala we-quarterfinal yeMTN 8. Emdlalweni wokuqala weligi iMaritzburg ihlule iPlatinum Stars ngo 2-0, yalandelisa nge-Ajax Cape Town ngendlela efanayo eHarry Gwala Stadium emasontweni adlule.
UMpandle, ohlale amasizini ebhentshini leBloemfontein Celtic, ungenelwe yigoli okokuqala ngesikhathi bebhekene neSuperSport koweMTN 8 eLucas Moripe. Ngesizini edlule ubehlaliswa ebhentshini nguVirgil Vries osevimbela iBaroka.
ENingizimu Afrika kukhona onozinti abebewukudla kwebhentshi baze baphanyeka amagilavu emgibeni. Kulaba kukhona u-Aubrey Mathibe, omemezele ngesonto eledlule ukuthi useyaliyeka ibhola, noLucky Shiburi owayewukudla kwebhentshi iminyaka kwiOrlando Pirates. UMathibe uhlale ebhentshini kwiKaizer Chiefs, Moroka Swallows nakuMaZulu. UShiburi, usanda kugudluzwa kwesokuba ngumqeqeshi wonozinti kwiBafana Bafana.
“Engizitshele kona ngesikhathi silungiselela ukuqala kwesizini ukuthi ngifuna ukudlala ngisho ngabe izinto azingihambeli kahle. Ngeke okwamanje ngizibize ngonozinti wokuqala kwiMaritzburg kodwa ngiyazinikela, ngisebenza kanzima. Uma unomqeqeshi okholelwa kuwena izinto ziba lula. Ngesikhathi ngingadlali kwiCeltic ngangitshelwa ukuthi yingoba anginawo amava owathola ngokuba senkundleni,” kusho uMpandle.
ITeam of Choice izophinde ithembele kuMpandle, obanga ijezi noRichard Ofori waseGhana noJethren Barr obekwiWits, ukuthi angavumeli nelilodwa ibhola liqabule inethi uma sebedlala owomlenze wesibili eHarry Gwala Stadium ngoMgqibelo ngo-8 ebusuku. Uma iTeam of Choice ingangenelwanga yigoli, izodlulela kowamanqamu.
Kungokokuqala ukuthi leli qembu lifinyelele kulesi sigaba. UMpandle uzobe engaqali ukudlala kowandulela owamanqamu ngoba wayesezintini ze-United FC kwiNational First Division (NFD) ngesikhathi ihlulwa yiChiefs ngo 2-1 koweNedbank Cup ngo-2014 iqeqeshwa nguDan Malesela.
“Ngikholwa wukuthi sengifike ezingeni lokuwina okuthize okuzothi uma ngiyeka ibhola ngikuveze. Sengike ngawudlala owandulela owamanqamu, sengifuna ukuwina indebe, hhayi ukudlala kowamanqamu kuphela,” kusho uMpandle.
“Kufanele silwele ukuthi singangenelwa yigoli. Uma senze kanjalo sizodlulela kowamanqamu. Kunzima ukudlalela ekhaya ngoba abalandeli balindele ukuwina kodwa kumele sisebenze.”