Kuchazeke owe-Arrows ngoPlaatjie
UHLABEKE umxhwele ngesibabuli somgadli weKe Yona Team esinguMakhosandile Plaatjie (23) umqeqeshi weLamontville Golden Arrows, uClinton Larsen.
Ngenhlanhla enkulu, lo mgadli ohlupha ngamandla nejubane odabuka e-Alice, e-Eastern Cape, ubevele etomule i-Arrows ukuthi uzohlala kuyona inyanga ehlolwa okuyisivumelwano esikhona phakathi kwePremier Soccer League (PSL) neNedbank abaxhasi beKe Yona Team.
“Ithuba elifana naleli kusemqoka ukuthi ngilibambe ngazo zombili ngoba sengiwumuntu onezingane ezibukela kuyena. Kusemahlombe ami ukucenta indlela ukuze bonke abangilandelayo esifundazweni sethu bahambe endleleni ebonakalayo,” usho kanje uPlaatjie ngeledlule ngesikhathi eqeda ukutomula ukuthi uzohlolwa yi-Arrows.
“Wonke umuntu ukhuluma ngaye kodwa angibasoli ngoba nami ngiwubukile umdlalo aqokwe kuwona njengomdlali ovelele. Uyithwalise kanzima iSuperSport. Konke ngaye kuyethembisa kodwa ngaphambi kokuthi sithathe isinqumo ngaye sizobheka ukuthi kukhona yini anakho thina esishoda ngakho,” kusho lo mqeqeshi othembele kuLerato Lamola, Knox Mutizwa noSibusiso Sibeko.
“Umthetho uyasiphoqa ukuba sibheke okuningi ngaphambi kokuthatha isinqumo ngaye. Kusemqoka futhi ukuthi ngikucacise ukuthi isinqumo akusona esami ngedwa. Kusamele simbheke ukuthi ungena kanjani eqenjini. Usebenza kanjani endleleni esisebenza ngayo nokuthi uyatholana yini nabanye abadlali. Sizomnika ithuba elanele lokuziveza kodwa uma ezoqhubeka nendlela engimbone eyiyona bedlala neSuperSport kuningi okuhle nokungihlaba umxhwele ngaye,” kusho uLarsen.
I-Arrows izobuyela emidlalweni yeligi ngoweBidvest Wits ekuhambeni. Ngokusho kukaLarsen, uyena nephini lakhe uMandla Ncikazi, Danny Phiri noSiyabonga Dube bayabuya kulo mdlalo ngoba isigwebo samakhadi sizobe sesiphelile. Bona bonke, okuhlanganisa noGavin Hunt nephini lakhe, bebekhishwe ngabomvu koweMTN 8 obukhona futhi eBidvest Stadium (kubhekene iWits ne-Arrows), ngasekuqaleni kwenyanga edlule.
“Konke kuhamba ngendlela kangangokuthi ngisho uJabulani (Shongwe), osijoyine engekho fithi ngokugcwele, angase abonakale kulo mdlalo. Ukudlala kwakhe kwiCHAN kumsizile ngoba izinga lakhe lokuba fithi likhula nsuku zonke,” kusonga uLarsen.