Babambisene kahle ohlelweni lwabo abeMetro
NGIYABONGA kubo bonke abangibhalelile ngesonto eledlule bephawula ngale ngosi lapho bengibhale khona ngoSipho “DJ Sgqemeza” Mbatha woKhozi FM.
Uma kuwukuthi ikuphuthile bengikhuluma ngendaba yokuthi uzwakala sengathi uyamdinga umuntu azobambisana naye kwiVuka Mzansi Breakfast Show.
Ngithe ukuswela umuntu azokhuluma naye kuzwakala kakhulu ngokuthi uze afune ukukhuluma noHlengiwe Mbatha ongumdidiyeli wohlelo noma agxile kakhulu emiyalezweni abantu abamthumelela yona kuTwitter.
Namhlanje ngifuna ukukuvezela abasakazi engikholwa wukuthi babambisene kahle ohlelweni lwabo. Labo nguDineo Ranaka noLerato Kganyago abethula iThe Bridge ngo-10 kuya ku-12 emini phakathi nesonto kwiMetro FM.
Ngesikhathi uBonang Matheba elaxaza lolu hlelo ngesikhathi esengena noLerato, iMetro ayichithanga sikhathi esingakanani yalanda uDineo.
Ngiyazi abanye bathi iMetro iyaqhubeka nokulanda osaziwayo engabe inika abasakazi ithuba kodwa ngifuna ukukuveza ukuthi uDineo akaqali ukusakaza ngeMetro ngoba uke wayibamba kwiY FM phambilini enoChilli M ohlelweni lwantambama.
Cha lezi zintokazi zenze samkhohlwa ngempela uBonang kwiMetro FM.
Akekho noyedwa kwabahlale bengibhalela ngenxa yayo le ngosi noma engijwayele ukukhuluma nabo ngomsakazo okhala ngokukhumbula uBonang.
Kwake kwaba nemibiko yokuthi uLerato noDineo abezwani kodwa kubonakala sengathi leyo mibiko yayingashayi emhloleni noma sebakulungisa lokho kungaboni ngaso linye ngoba uhlelo lwabo luyagijima. Banikezana kahle ithuba lokukhuluma ngaphandle kokuthi omunye adonse abheke le nomunye naye azibhekele lapho ethanda khona.
Lokhu kwenza kungabi khona umsindo belokhu bephikisana njalo.
Okuhle ngoDineo wukuthi ukhuluma ngokukhululeka. Ungamfanisa noNaked DJ esigabeni esiyintandokazi kulolu hlelo, i-Ask A Man.
Kulesi sigaba kushaya abantu befuna izeluleko ngezothando.
UNaked akahlonizi, ukutshela “ukheshi” into uyisho njengoba injalo. Uyafana noDineo naye akalumi ephephetha.
Uma kuwuLwesihlanu uyezwa ngempela ukuthi impelasonto ifikile lapho uLerato eqhulula khona amamix kwi #LKGMix.
Ungangibhalela ku-fanelesibonge.bengu@inl.co.za noma kuTwitter: @fanelebengu noma ku-Instagram @fanelebengu