Akanavalo lokugijima kwelimsayinisile
UZIMISELE ngokufika azakhele igama eqenjini lakhe elisha laseFrance, umdlali weBafana Bafana, uBongani “Ben 10” Zungu, osayine naleli qembu ngemizuzu yokugcina yokuvalwa kwewindi ngoLwesine olwedlule.
UZungu obeyibamba kwiVitoria Guimaraes yasePortugal, usayine inkontileka yeminyaka emine kwi-Amiens SC ekhushulelwe esigabeni esikhulu kuLeague 1 ekuqaleni kwesizini.
Lo mdlali oyibamba esiswini ufike kwezwakala kwiGuimaraes njengoba bese ephenduke esinye sezithandwa zeqembu. Amagalelo akhe asize leli qembu laqeda endaweni yesine kwiligi okulifake kwi-Europa League yale sizini. Nokho kwiAmiens useyoqala impilo entsha njengoba labo makoti beligi enkulu egabe ngamaqembu amakhulu njengeMonaco nePSG, bengayiqalanga kahle isizini.
Basanqobe kanye emidlalweni emine yeligi, bashaywa kwemithathu.
“Kudingeka ukuthi ngifike ngijwayele ngokushesha ngoba asikho isikhathi njengoba ngenzile ePortugal. Iligi isiqalile, sinomdlalo ngempelasonto. Anginalo uvalo ngoba angikwesabi ukubhekana nezinselelo. Angingabazi ukuthi ngizokwenza kahle,” kusho uZungu.
NgoMgqibelo iqembu lakhe elisha lizodlala neStrasbourg ekuhambeni.
Uthe yize ukusayina kwakhe kwi-Amiens kwenzeke ekugcineni kodwa akusona isinqumo asithathe exhamazela.
“Ngikhulumile nabo ngagculiseka ngabafuna ukukwenza futhi ngibonile ukuthi bakhona abanye abadlali abahle ababasayinisile ukusiza iqembu. Ngijabule ngokusayina kubona,” kusho lo mdlali ogqame kuleli egijima kwiMamelodi Sundowns nakwiUniversity of Pretoria.
Ukuvezile ukuthi ngesikhathi kusavulwe iwindi ubezitshela ukuthi uzoya eqenjini elikhulu ngoba uke wamataniswa neBenfica okuyiqembu elikhulu ePortugal.
EFrance uzofikela kozakwabo kwiBafana okunguKermit Erasmus oyibamba kwiStade Rennais noKeagan Dolly odlala kwiMontpellier futhi abadlale naye kwiSundowns.
UPitso Mosimane ongumqeqeshi weSundowns wathi akakakulungeli ukuya phesheya uZungu ngesikhathi ehamba kuleli. Nokho uthe akazimisele ukusheshe abuye e-Europe.
“Ngeke ngibuye. Kuyakhulisa ukudlala laphaya, uba yindoda. Ibhola lihle kanjalo nabalandeli,” kusho uZungu.