Ugwazwe wuzakwabo ngesikele
AKASALUBHADI esikoleni ngenxa yokwesaba umfundi okuthiwa ngesonto eledlule ugwazwe wuzakwabo amanxeba amaningi ekhanda bebanga isikele.
Umfundi igama lakhe eligodliwe (18) wakwa-Y eMlaza, ofunda uGrade 11 eZwelihle Secondary uthe usesaba nokunyathela emagcekeni esikole ngemuva kokuthi egwazwe wumfana abafunda naye bebanga isikele ngoLwesine.
Uthe ingxabano yabo iqale ngesikhathi benza umsebenzi wesikole abawenzela egumbini abafundela kulo uma sekuphume isikole. Uzakwabo ufune ngodli isikele abesisebenzisa esika amaphepha omsebenzi wesikole.
“Uze kimina wazama ukungihlwitha isikele ngenkani. Nginqabe naso sasibanga wagcina esikeka kancane esiphongweni. Lokho kumdinile waqala wangishaya,” kusho umfundi.
Uthe ubembhuquzisa phansi emkhahlela nasebusweni. Ubuye wathi usizwe umngani wakhe omthathe waya naye ethoyilethi eyomgeza nokuyilapho umsolwa emfice khona wamgwaza kaningi ngesikele ekhanda.
Unina womfundi uthe udumele ngokudembesela kwamaphoyisa ukubopha umsolwa okuthiwa uyaqhubeka nokuya esikoleni ekubeni ingane yakhe isala ezifundweni.
“Uthisha owayekhona esikoleni ngesikhathi kulinyazwa ingane uthe kumele sihlangane nabazali bomfana olimaze ingane yami sixoxe. Okubi wukuthi ingane seyesaba nokuya esikoleni, kungcono ukuba ikhona imizamo engenziwa okungenani ithole ithuba lokubhala ngemuva kwalokho sengingayifunela isikhala kwesinye isikole. Angazi ukuthi umfundi olimaza omunye ngalolu hlobo uqhubeka kanjani nokufunda angathathelwa zinyathelo,” kusho unina womfundi.
Okhulumela amaphoyisa KwaZulu-Natal, uColonel Thembeka Mbhele, uthe amaphoyisa asesiteshini iBhekithemba aphenya icala lokushaya nelokugwazwa komfundi ngesikele wathi bekungakaboshwa muntu. Okhulumela uMnyango wezeMfundo esifundazweni, uMnuz Kwazi Mthethwa, uthe abazali kumele balekelele ekuqinisekiseni ukuthi izingane ziziphatha ngendlela. “Isikole asiyona inkundla yokulwa. Siyakugxeka kakhulu ukulimazana kwabafundi ngalolu hlobo. Kodwa sifisa abazali basebenzisane nothisha ukubuyisa isimilo nokuziphatha kubafundi ngoba ekugcineni izingane ezabo. Sinxusa umzali wengane elimele ukuthi akhulume nothishomkhulu nezinhlaka ezibhekelele isikole ukuze kutholakale isixazululo,” kusho uMthethwa.