Kungenwe ngevosho kwesikaChillies
BANGENGE ngevosho, kwangena ngaphakathi ehholo izithuthuthu zibanga umsindo enkonzweni yesikhumbuzo “yesigebengu ebesigoqoza izimoto”, uMnuz Mondlikayise Sandile “Chillies” Bhengu ebikwa-M eMlaza, izolo.
UBhengu (37), uchazwe wumndeni nabangani njengeqhawe ebelisiza umphakathi yize bebevuma ukuthi ubeziphilisa “ngoku goqoza” izimoto.
Umngani kaChillies, uMnuz Mbuso Mazibuko utshele Isolezwe ukuthi abakuphiki ukuthi kukhona ubugebengu abebenza kodwa miningi imisebenzi emihle abeyenza emphakathini.
“Namhlanje kugcwele abantu besonto, omama abadala nobaba bazogubha impilo kaChillies ngoba ubenobuntu. Ubewusiza umphakathi, ubebathanda abantu futhi ewukhonzile umndeni wakhe. Sifuna kuphenywe ngokubulawa kwakhe ngoba ubengalwi namaphoyisa, nesibhamu ubengasiphathi nhlobo njengoba ebulewe,” kusho uMazibuko.
Amalungu omndeni abekhuluma ededelana kule nkonzo abalule ukuthi alahlekelwe wumuntu obebondla nomuntu obeyikho konke empilweni yabo.
Obekhulumela omakoti umakaKhosi (igama eligcine lingatholakalanga) uthe obondla ekhaya uBhengu futhi ebathanda njengomakoti.
“Sife olwembiza ngokushona kukaSandile ngoba besibheke okuningi kuye. Kumanje kunzima nokuba ngikhulume,” kusho umakaKhosi.
Kukhulume nendodana yomfowabo abeyikhulisa (nayo elingatholakalanga igama layo).
“Ubaba ungikhulise kusuka ngimncane engenzela konke. Ubebasiza nabantu abadingayo. Ngelanga abulawa ngalo kwakungathi usazovuka embhedeni esibhedlela. Angikholwa namanje,” kusho indodana.
Abanye abangani bakamufi abacele amagama abo engavezwa ngezizathu yokuphepha bathe amaphoyisa awavumelekile ukuba abulale umuntu amsolayo kodwa kumele ambophe futhi bafuna kuphenywe.
“Esikudingayo wubulungiswa. Asizange sisho zonke lezi zinto ezinkundleni zokuxhumana ukuthi sizomphindiselela umfowethu. Ayikho nemoto esizoyishisa. Esikufunayo ukuba kwenziwe umsebenzi womthetho kula maphoyisa abulele umfowethu ekubeni wayephakamise izandla,” kusho umngani.
Obekhulumela Amabhubesi Motor Cycle Club, uMnuz Sandile “Mkholwa” Mposula uthe ufike ngo-2016 uBhengu kodwa washeshe waba yilungu ngokugcwele futhi ubenza imisebenzi eminingi esiza umphakathi. Leli qembu lithe belingenalo ulwazi ukuthi “ugoqoza” izimoto.
Kule nkonzo bekusha izingoma zokholo, kuthi kusahlatshelelwa kushe igqom’ abantu badanse baze bakhase phansi.
Ingoma yakhe ethi: Uyababa Wepelepele, ibihamba phambili. Obephethe uhlelo ubevele ahlokoloze abantu athi: Chillies, kuchwazwe ihholo.
Bekugcwele izithuthuthu, izimoto eziphambili nosisi abebeswenke beconsa, ubungafunga ukuthi wumcimbi wokubhiyoza.
Abesifazane abebefake iziketi ezincane nabo bebengazibekile phansi, bedansa.
Owesifazane okuthiwa yintombi yakhe abehlala nayo, nobehlezi nezihlobo, ukhale waze wakhishwa ehholo wayiswa ngaphandle.
Kuzwakale ukuqhuma kwesibhamu kodwa kwabuye kwanqamuka.
Ayikho inhlobo yephoyisa engazange ibonakale eMlaza. Ehholo bekunkanise amaphoyisa, esangweni esesha yonke imoto ebiphuma. Akuzange kushaywe izidudla kodwa izithuthuthu kuphela ebezenza umsindo. Kunowesilisa obehamba ngeGTI ebomvu oboshiwe ngemuva kokutholwa kwamagobolondo ezinhlamvu emotweni yakhe.
Okhulumela amaphoyisa KwaZulu-Natal uColonel Thembeka Mbhele uqinisekisile ukuthi kuboshwe oyedwa ngokuqhumisa isibhamu eMlaza. Kulindeleke ukuba avele enkantolo namhlanje.