Basola uqhekeko lwesifunda ngokuxoshwa kwaMagaqa
IMEYA yoMkhandlu waseMzimkhulu, uMnuz Mphuthumi Mpabanga ithi iphoxekile ngokunqatshelwa ukuba ingene kubo kowake waba nguNobhala-jikelele we-ANCYL uMnuz Sindiso Magaqa ngesikhathi izokhalisa umndeni wakhe ngemuva kokushona ngoMsombuluko.
Engxoxweni neSolezwe izolo, uMpabanga uthe le nto eyenzekile imthusile ngoba ubengayilindele.
“Le nto eyenzekile ayingiphathanga kahle ngoba bengiya kubo kaMagaqa ngokwesintu ngiyokhalisa umndeni ngemuva kokuvela komkhuhlane, uma ngivinjwa ukuthi ngingene kubo bengingeke nginqabe ukuhamba,” kusho uMpabanga.
Uthe akazi leli dlanzana ebelibaxosha ukuthi lizithathaphi lezi zinsolo elikhuluma ngazo njengoba libanuka.
“Mina siqu sami abukho ubutha obebukhona phakathi kwami noMagaqa njengoba singakaze sixabane nangelilodwa ilanga,” kusho uMpabanga.
Mayelana nokuthi uMagaqa ubebahlupha emkhandlwini ehlale ebuza ngehholo lomphakathi elakhiwayo elingapheli kodwa osekuphume izigidi ngalo, uMpabanga uthe ngokomsebenzi abawenzayo kumele babuzwe imibuzo, wengeza ngokuthi uma uMagaqa ekade ebuza ngehholo bekuyilungelo lakhe. UMpabanga uthe ngeke esabuyela kubo kaMagaqa ngoba egwema umsindo.
IMenenja yoMkhandlu waseMzimkhulu uMnuz Zweliphansi Sikhosana nayo exoshiwe kaMagaqa ithe yize ikade ingalindele ukuthi bangaxoshwa kodwa ayithukanga.
USikhosana uthe ukuxoshwa kwabo kugqugquzelwa yipolitiki.
“Isifunda sethu iHarry Gwala sihlukene phakathi ikakhulukazi njenjoba kuyiwa engqungqutheleni yesifunda, ngalokho izinto ezifana nalezi ungazilindela. Uzokhumbula ukuthi bekungesikho okokuqala kwenzeka into efana nale njengoba kukhona abaholi abanqatshelwa ukuthi bakhalise umndeni kaMnuz Khaya Thobela owayenguSomlomo emkhandlwini wethu,” kusho uSikhosana.
Uthe abanye abantu abebehola leli qeqebana elibaxoshile ligaqele ukuvala izikhala zamakhansela ashonile kumasipala wabo. USikhosana uthe isimo siyabaphoqa ukuthi bagcine beyile kubo kaMagaqa yize kukhona abangabafuni.
Omunye umholi oxoshiwe uMnuz Mluleki Ndobe oyiMeya yoMkhandlu waseHarry Gwala ophinde abe yiPhini likaNobhala we-ANC KwaZulu-Natal unqabile ukuphawula wacela ukuba kuthintwe umkhulumeli we-ANC KwaZulu-Natal uMnuz Mdumiseni Ntuli.
“Ngokuhlonipha isimo sakwaMagaqa ngicela ukungaphawuli lutho okwamanje,” kusho uNdobe.
Iqeqebana lamalungu e-ANC ebelivutha lingabaselwe linqabele laba baholi abathathu ukuba bangene kubo kaMagaqa ngoba libasola ngokufa kwakhe.
UMagaqa ushonele esibhedlela ngoMsombuluko ngemuva kokudutshulwa ngoJulayi nonyaka.
Ubelokhu esesibhedlela kusukela alimala.
Okhulumela i-ANC KwaZuluNatal uMnuz Mdumiseni Ntuli uthe ubuholi besifundazwe buzobuyela eMzimkhulu ngaphambi komngcwabo kaMagaqa buyoxoxa namalungu anezikhalo.
UNtuli uthe la maqabane obekukhulunywa ngamagama awo ngamalungu abebhikisha bawacele ukuthi angangeni kubo kamufi ngoba begwema umsindo.