‘Uhlahlelwe’ wumkakhe ngegeja
ISADIDEKILE indodana yekhehla laKwaNkombose, eMtubatuba, ‘eligencwe’ wumkalo ngegeja lashona.
UMnuz Wilson Mcumbaza Sikhakhane (74) kusolwa ukuthi uhlahlelwe wumkakhe oneminyaka engu-58 ngegeja wazinikela amaphoyiseni. Lesi sehlakalo esenzeke ngo-7.30 ebusuku ngoLwesibili sishaqise indodana yabo etshele Isolezwe ukuthi ibingazi ngengxabano phakathi kwabazali bayo.
Elandisa iphephandaba, uMnuz Siyabonga Sikhakhane, uthe ubephuma ukuyothenga igilosa edolobheni wafika kubo sekwenzeke lesi sehlakalo. Uthe ubehlala nabo bobabili abazali bakhe nendodana yakhe eneminyaka eyisishiyagalombili ebisele nabo emini. Uthe abazali bakhe bebeye edolobheni ngoMsombuluko bengaxabene.
“Ngifike ngangqongqoza ngiphethe opulastiki begilosa kwavula umama. Ngimbingelele wangavuma ngamangala ngoba ngokujwayelekile uye ajabule uma kukhona engikuphethe. Ngiye endodaneni yami ebilele kusofa ngayivusa, umama waphuma endlini,” kuchaza uSikhakhane.
Uthe umangele uma unina engasabuyi emnyango ngoba ubecabanga ukuthi uye endlini encane.
“Ngidlulele ekamelweni likababa ngamthola egcwele igazi esembhedeni. Ubenamanxeba amabili entanyeni nasebusweni lungekho nodebe lwangenhla. Ubezama ukukhuluma kodwa avele akhwehlele uma ngimbiza,” kusho uSikhakhane.
Uthe uzame imoto bamphuthumisa emtholampilo KwaMsane kwatholakala ukuthi useshonile. Ushayelwe amaphoyisa ucingo emtshela ukuthi unina uzinikele emaphoyiseni. Kusolwa ukuthi usebenzise igeja kulesi sigameko njengoba amaphoyisa elithole ekamelweni lisongwe ngengubo yokulala.
USikhakhane uthe usaphithene ikhanda akazi ukuthi uzoqalaphi ukulungiselela umngcwabo kayise abebephila ngempesheni yakhe. Uthe unina akasebenzi kanti naye ubamba amatoho abuye aphele. Ubuye wathi ngunina owazi nemishwalense kayise kanti akazi ukuthi uzoqalaphi elungisa njengoba naye eseboshiwe.
“Sengifana nentandane ngoba kuyafana nokuthi sengilahlekelwe nangumama ozobhadla ejele. Sengizibikele izihlobo nazo zisadidekile,” kusho uSikhakhane.
Uthe akamdinelwe unina kodwa usafuna ukuzwa kahle ukuthi kwenzekeni. Utshele lsolezwe ukuthi isimo sikanina asikaze sibe sihle selokhu bangcwaba umfowabo ngo-2015. Uthe umfowabo, uFanele Sikhakhane, wayesanda kuqeda u-matric ngesikhathi ebulawa yikhanda elalimphethe. Kuthiwa unina ubelokhu ekhala ngokhwantalala esejwayele nokuhlala yedwa endlini. Kuvele nokuthi eminyakeni edlule uke waphanjanelwa wumqondo kodwa washeshe walumala.
Okhulumela amaphoyisa KwaZulu-Natal, uLieutenant-Colonel Thulani Zwane, ukuqinisekisile ukuthi umsolwa uzinikele emaphoyiseni wathi uzovela enkantolo maduze.