Zinqindwe amandla izifundazwe ze-ANC
I-ANC inqinde amandla izifundazwe nezifunda zayo ngohlelo lokuphakanyiswa kwamagama abantu abazokhethwa ezikhundleni zobuholi beqembu kuzwelonke.
UNobhala Jikelele waleli qembu, uMnuz Gwede Mantashe uveze lokhu esithangamini sabezindaba ekomkhulu lenhlangano eLuthuli House, eGoli, ngoLwesibili.
UMantashe ubezocacisa ngamalungiselelo engqungquthela yokukhetha ubuholi ebhekwe ngabomvu ezoba ngoDisemba nonyaka. Utshele abezindaba ukuthi izifunda nezifundazwe ngeke zisondele ohlelweni lokuphakamisa amagama kodwa amagatsha azobekwa eqhulwini ukuthi enze lokho. Wathi kungumsebenzi wamagatsha ukuphakamisa amagama abantu abafunayo.
“Izifunda zingakhuluma nje zifike lapho zithanda khona, azinawo amandla, zisuke zizama ukunxenxa abantu ukuthi kufanele bacabange kanjani. Ukuphakanyiswa kwamagama kuzoqashwa ngeso lokhozi,’’ kusho uMantashe obehambisana nokhulumela iqembu uMnuz Zizi Kodwa.
Uthe kuzoba nezithunywa ezizobe ziqaphe lolu hlelo ukuthi luqhubeka ngobunono. UMantashe ukhuluma kanje-nje, lesi siphakamiso kwaphunywa naso engqungqutheleni yemigomo eyayiseNasrec, eGoli ngoJulayi. Leli qembu lachaza lesi sinqumo njengomzamo wokuqeda umsindo nenkohlakalo uma kuphakanyiswa amagama abaholi.
Uthe izifundazwe eziyisithupha seziqedile ngokucwaningwa kwemininingwane yamalungu eqembu emagatsheni sekusele ezintathu. Umsindo ngamagama abaholi eqenjini ugqame kakhulu ngesikhathi sokhetho lohulumeni basekhaya obelungo-2016.