Unconyiwe uRamaphosa ngokukhuluma ngodaba lomjolo
IZAZI zepolitiki zilincomile iPhini likaMengameli, uMnuz Cyril Ramaphosa, ngokuthi asheshe akhulume iqiniso ngezindaba ‘zomjolo’ wakhe ePhalamende izolo.
USolwazi Dirk Kotze oyiNhloko yezepolitiki e-Unisa, uthe uRamaphosa ubefuna ukusheshe adlule kule ndaba ukuze ingamlandeli okhethweni lobuholi be-ANC ngoDisemba.
UKotze uthe uRamaphosa ukhombise ukukhula uma ekhuluma ngalolu daba ePhalamende.
“Ngithanda ukuqala ngikhulume ngamahlebezi okuthi ngiyajola kodwa ngizokhuluma yonke into ezinsukwini ezimbili ezizayo,” kusho uRamaphosa izolo.
Uthe uRamaphosa akafuni ukubuzwa ngabezindaba noma ngamanye amaqabane kwi-ANC ukuthi kwenzekani, kodwa ufuna ukushesha azikhulumele.
UKotze uthe abantu abashesha bakhulume ngezindaba zabo zangasese kuyabasiza ukuthi izindaba ezimbi ngabo zisheshe zishabalale. Wenze isibonelo ngoNgqongqoshe eHhovisi likaMengameli uMnuz Jeff Radebe, owaxolisa emuva kokuvela kwezinsolo zokuthi ucele izithombe zesitho sangasese sowesifazane.
Uthe noMengameli waseMelika, uMnuz Bill Clinton, waxolisa emuva kokujola noNksz Monica Lewinsky owayesebenza ehhovisi lakhe ngo-1998.
“Angikholwa ukuthi lezi zinsolo zizomlandela uRamaphosa okhethweni lwangoDisemba ngoba ufuna ukuyixazulula le ndaba,” kusho uKotze.
Amalungu ePhalamende awazange abuze ngomjolo kaRamaphosa kunalokho agxile ezindabeni zomnotho nasekutheni ngabe kuzokwenziwani ngeBell Pottinger etholwe inecala lokudala uhlevane kuleli.
Uthe uzongenelela odabeni lokunikezwa ushwele kukaNkk Grace Mugabe oyinkosikazi kaMnuz Robert Mugabe.