Kuphazamiseke ukufunda eDUT bekhala ngemali yokudla
KUBE nokuphazamiseka kokufunda esikhungweni semfundo ephakeme iDurban University of Technology izolo, eThekwini bekhala ngokungafakelwa imali yokudla okuthiwa iningi labo selokhu ligcine ngoMeyi ukuyifakelwa.
USihlalo weSouth African Student Congress (Sasco) kulesi sikhungo, uSphephelo ‘440’ Mthembu, ngesikhathi ekhuluma neSolezwe ngemva kokuthi kube nale mibiko yezikhalo zabafundi ngemali yokudla evela esikhwameni esihlinzeka abafundi ngoxhaso lwemali iNational Student Finacial Aid Scheme, uthe umkhandlu wabafundi oholwa yi-ANCYL yiwona ongabasizanga abafundi okuthiwa kukhona kubo abangakaze bayithole imali yokudla selokhu kuqale i-semester yesibili.
Uthe abafundi banqume ngokwabo ukuziyela kubaphathi besikhungo ngemuva kokuthi ngoLwesibili bebethenjiswe ukuthi ngakusasa (ngoLwesithathu) kuzoshaya u-12 phakathi kwamabili imali yabo yokudla isingenile kuma-akhawunti abo kodwa yangangena. Uthe ubuholi obuphumayo buthathe into efike nabafundi wayenza eyawo okuholele ekutheni abafundi badube ngoba abasawuzwa umkhandlu omele abafundi okhona futhi usuphelelwe isikhathi.
“Kuyasethusa ukuthi umkhandlu osuphelelwe yisikhathi ngokomthetho wesikhungo kodwa usaqhubeka nokuhola abafundi,” kusho uMthembu.
Uthe kwakuvunyelwene ngokuthi kuzobalwa amabhokisi amane asele amavoti abengakavulwa kodwa kwathathwa isinqumo sokuthi ukhetho luqalwe phansi bangabe besaziswa.
Umengameli wesigungu sabafundi uZama Ncube uthe isiteleka ebesikhona besiholwa isigungu esengamele abafundi.
“Asazi basho kanjani ukuthi asikho isigungu esimele abafundi ekubeni kuyithina esikhuluma nabaphathi besikhungo ngezimfuno zabafundi. NgoLwesibili isikhungo sithembise ukuthi imali izongena izolo, savumelana nabafundi ngokuthi sizoya esitelekeni uma ingangeni, esigcine sikhona. Kodwa imali igcine ingenile kwabanye nakuba ingangenanga kuwona wonke umuntu kodwa sizoba nesithangami nabezindaba kusasa (namuhla) ukucacisa,” kusho uZama.