I-KZN engozini yokuphela kwegazi
ABENHLANGANO eqoqa igazi kuleli, iSouth African National Blood Services (SANBS) bathi iKwaZulu-Natal ibhekene nenkinga yokushodelwa yigazi.
Lesi sifundazwe sesisele negazi lohlobo luka-Group O elenele amahora angu-43.2 kuphela.
ISANBS seyinxuse abantu abavame ukunikela ngegazi namalungu omphakathi ukuthi beze ngobuningi babo bezonikela ukuze kugwemeke ingozi. Igazi lisiza abantu abanezifo ezahlukene okubalwa kuzo umdlavuza wegazi, abantu ababe sezingozini, nabanye impilo yabo esengcupheni ngenxa yezinye izizathu ezenza badinge ukunikelelwa ngegazi.
UNksz Silungile Mlambo ongamele ezokumaketha iSANBS uthe lincane kakhulu igazi elikhona.
“Igazi elikhona la eKZN lincane. Igazi elingu-Group O sinegazi elenele izinsuku ezingu-1.8 kuphela, okungaphansi kuka-200 units,” kusho uNksz Mlambo.
Uthe kufanele engabe kunegazi elingama-unit angu-500 ohlobo luka-Group O. Lesi simo usichaze njengesibucayi.
Uthe igazi alibalulekile nje kuphela ezigulini nabalimele kodwa liphinde libaluleke komama abasuke bebeletha – abanye bagcina belahlekelwe yigazi eliningi ngesikhathi bebeletha badinge ukufaka elinye.
“Baningi abantu abahlangabezana nezimo ezibucayi ezibabeka engozini, abagcina sebedinga ukufakwa igazi. (Ukunikelelwa ngegazi) Yikhona okusiza umama osuke enenkinga yokopha ukuthi aphile akwazi ukunakekela ingane yakhe asuke esanda kuyithola, ayinike uthando. Yikhona okusiza umuntu ohlangabezana nezinkinga ehlinzwa. Yikhona okusiza iziguli ezinomdlavuza ukuthi zisinde uma zinikwa imishanguzo,” kusho uNksz Mlambo.
Uthe ukunikela igazi akuyona into encane kungukusindisa impilo yabantu ngokwenza into elula. Unxenxe abantu base-KZN ukuthi basheshe bakusukumele ukunikela ngegazi. Uthe kungakuhle ukuthi abantu bakulesi sifundazwe bagcine sebengabantu abavame ukunikela. Ngokusho kwakhe uma abantu benganikela kane ngonyaka kungagwemeka izimo ezifana nalesi isifundazwe esibhekene naso njengamanje.
Ukuthola kabanzi ngokunikela igazi ungavakashela isikhungo sakwa-SANBS esiseduze nawe noma uvakashele iwebsite yabo ku: https://sanbs.org.za/ noma ubathinte ku: 0800 11 90 31.