Sizolahlekelwa uma kuvalwa iSeda: osomabhizinisi
BAKHALA ngokuthi bazolahlekelwa osomabhizinisi baseThekwini uma kuvalwa isikhungo abasebenzela kuso iSmall Enterprise Development Agency (Seda) esiseduze kwerenki yamatekisi aseNanda, emakethe.
Isolezwe libike ngodaba lokungabibikho kwemali emasontweni amabili edlule kangangoba umphathi wesikhungo, uMnuz Protas Madlala, usebenzise u-R360 000 wakhe ukuqinisekisa ukuthi asivalwa.
AbakwaSeda kuzwelonke bathe benza konke okusemandleni ukuqinisekisa ukuthi asivalwa isikhungo.
Izolo osomabhizinisi bathe ngeke kulunge ukuthi kuvalwe amahhovisi akwaSeda ngoba kusho ukuthi bazolamba ngoba kabanazo izinhlelo zokuthuthela kwezinye izindawo.
UMnuz K Gasa, onenkampani eqoqa imfucuza, uthe bafunde ephephandabeni ukuthi kunenkinga yemali futhi bayathemba ngeke sivalwe.
“Ngicabanga ukuthi uHlokohloko (Protas Madlala) usazositshela ukuthi umhlangano wangoLwesihlanu uhambe kanjani ngoba sisasebenza ngokujwayelekile. Ngafika lapha ngo1998. Ngiqoqa amakhathoni, ocwazi namaphepha,” kusho uGasa.
Uthe uma kuvalwa iSeda eThekwini kusho ukuthi iphelile impilo yabo bengosomabhizinisi abancane.
“Sisebenze kanzima ukusungula amabhizinisi ethu. ISeda yisona sikhungo esisilekelelayo sisinike nendawo efanelele yokusebenza,” kusho uGasa.
UMnuz Elijah Nxumalo ongumakhenikha enkampanini iKari Vehicle Repairs uthe ukuvalwa kweSeda kuzoba nomthelela omubi emnothweni weTheku ngoba baningi abantu abaqashwe ngamabhizinisi asebenzela kule ndawo.
“Sifike lapha ngo-2013 futhi amakhasimende ayazi ukuthi sitholakala la. Uma sekuvalwa asazi sizoshonaphi ngoba amakhasimende ethu azi ukuthi sisebenzela eSeda,” kusho uNxumalo.
Imizamo yokuthola ukuphawula kwabakwaSeda kuzwelonke ayiphumelelanga ngoba abayiphendulanga imibuzo abathunyelelwe yona nge-email.
UMadlala ukuqinisekisile ukuthi kube nomhlangano obe yimpumelelo nethimba lasePitoli wathi ngeke akwazi ukudalula okuningi.