UDlungwane uchitha eyokuthi ngeke kuholwe
UNGQONGQOSHE wezeMfundo KwaZuluNatal, uMnuz Mthandeni Dlungwane, uthi phansi amaphaphu kubasebenzi bomnyango abacabanga ukuthi ngeke bahole ngoba imali ikhona.
UDlungwane uthe imali yokukhokhela izinhlelo zomnyango okubalwa nalabo abenza imisebenzi nomnyango, ikhona kodwa inkinga bathola isamba esithile kumgcinimafa nyanga zonke.
“Sithola u-R3.6 billion ngenyanga, u-R3.3 billion uya emaholweni abasebenzi bese kuthi u-R300 million usalele ezinye izidingo zomnyango. Yinkinga endala le kodwa sinayo imali ebhange. Abantu abangesabi, lokhu akusho ukuthi imali asinayo ukuthi sinikwa ingxenye ethile nyanga zonke ngumgcinimafa,” kusho uDlungwane.
Ukusho lokhu ephendula umbuzo kasihlalo wekomiti lezemfundo esiShayamthetho uNkk Linda Hlongwa-Madlala, kuleli sonto obebuza ukuthi ngabe umnyango uzokwazi yini ukukhokhela abasebenzi bawo ababalelwa ku-115 000, u-89 000 wabo okungothisha umholo kuze kuphele unyaka wezimali.
Amalungu aleli komiti azwakalise ukukhathazeka ukuthi kunezinsolo emphakathini zokuthi imali ayisekho emnyangweni ngoba idliwe.
UMnuz Jomo Sibiya we-ANC, uthe bakuthokozele ukuthola umbiko ogcwele ngezinto ezithinta imali emnyangweni ngoba kukhona abathi imali ayisekho ngoba isidliwe.
NoNkk Thembi MadlophaMthethwa we-IFP uthe ziningi izinsolo ezisabalele zokuthi umnyango awusenayo imali.
Lokhu kulandela umbiko othulwe kuleli komiti oveza ukuthi abanye othisha abakhokhelwanga izibonelelo zokusebenza ezindaweni ezisemakhaya.
UDkt Vusumuzi Nzama, inhloko yomnyango uthe zimbili izinyanga ezibanika inkinga uFebhuwari noMashi ikakhulu uma kumele bafake imali yezikole eyaziwa ngama-norms and standards.
UNzama uthe kuyaye kudingeke ukuthi bathumele ngaphezulu kuka-R800 million ngenyanga eyodwa kodwa ngenxa yokuthi basala no-R300 million kuphela ngenyanga bese ezinye izinhlelo bazikhokhele ngemuva kwesikhathi esihleliwe.
“Siyakhokha kodwa ezinye izinhlelo sizikhokhela ngemuva kwesikhathi esibekiwe. Sinayo imali ebhange inkinga wuhlelo lomgcinimafa esingakwazi ukulushintsha,” kusho uNzama.
Ebuzwa ngokuthi ngabe sezikhokhelwe yini izincwadi, uthe sezikhokhelwe wathi kumele ziqale ziyiswe ezikoleni.
UNzama uthe ikhona imali yokukhokhela othisha.
UDlungwane uthe abakwazi ukuthi bangaphelelwa imali ngoba isabelo somnyango esibalelwa ku-R47 billion abakasiqedi sonke.