Uzovulelwa icala unina wezingane ezine ezibulewe esayophuza
UZOVULELWA amacala obudedengu nguMnyango wezokuThuthukiswa koMphakathi esifundazweni, unina wezingane ezine ezitholwe KwaNzimakwe ngasePort Edward, ngempelasonto zibulewe.
Lokhu kuvele esitatimendeni esithunyelelwe abezindaba yihhovisi lalo mnyango, ngemuva kokuthi ungqongqoshe walo mnyango ehambele lo mndeni ngoLwesibili.
UNksz Slindile Mbhele, uzivumele ukuthi ubezishiya izingane zodwa aye kophuza.
UNgqongqoshe wezokuThuthukiswa koMphakathi KwaZulu-Natal uNkk Weziwe Thusi obevakashele kulo muzi ukuzobhonga emswaneni, unxuse amalungu omphakathi ukuthi aqikelele ukugada izingane.
UNksz Matuse Khuzwayo ngesikhathi ekhuluma neSolezwe mayelana nokubulawa ngesihluku kwezingane zikamfowabo uMnuz Andile Khuzwayo ongasekho, uthe unina wezingane ubezikhonzile.
Uthe umfowabo ubenezingane ezimbili kuNksz Silindile Mbhele, okungoLwandile (10) noSiphindile (8) abatholwe bebulewe kubo, nezingane zakwabo uBandile (12) noLwandle (4).
Uthe nakuba ubengahlali nezingane zikamfowabo, ezagcina ngo-2014 ukufika kubo mhla kufihlwa uyise kodwa ubeke ezwe izincomo emantombazaneni abehleze eficana noSilindile (umama wezingane) ephuma kothengela izingane.
“Bengike ngizwe ukuthi uvamise ukubonakala emathaveni, kodwa mina angikaze ngimbone.
“Ngaphambi kokuba kushone ubhuti bebethandana kangangoba ingane endala, uBandile ufike nayo inezinyanga ezimbili izelwe, ikhule yazi ukuthi ingeyalapha ekhaya,” kusho uNksz Khuzwayo.
Uthe usola ukuthi ukushona kukamfowabo yikhona okumenze wagcina esezinikele etshwaleni, kodwa wathi bebengakaze bezwe lutho okumayelana nokuhlukumezeka kwezingane ngaphandle kwamahemuhemu abebewezwa wokuthi uke abonakale ezindaweni zokucima ukoma. Uthe bebehlala ndawonye nomfowabo, futhi ushone esesezinhlelweni zokumlobola.
UNksz Mbhele ugxekwe kakhulu nasezinkundleni zokuxhumana abantu bemsola ngobudedengu.