Isiphakamiso ngothisha abafundisa ngePGCE
AMALUNGU ekomiti lezemfundo esiShayamthetho saKwaZulu-Natal afuna kuphenywe ngothisha abafundisa kulesi sifundazwe ngesitifiketi iPostgraduate Diploma in Education (PGCE).
Lesi sitifiketi senziwa unyaka owodwa uma lowo muntu enezinye iziqu okungezona ezokufundisa.
Abafundi abaningi abangawutholi umsebenzi emikhakheni abasuke beyifundele benza lesi sitifiketi unyaka owodwa bese bethola umsebenzi.
USihlalo wekomiti, uNkk Linda Hlongwa-Madlala, ucele ukuthi uMnyango wezeMfundo wenze umbiko ngokuthi bangaki othisha abasebenza ngalezi zitifiketi.
Uthe bafuna ukuthola ukuthi bangaki labo thisha kulesi sifundazwe nokuthi benze ziphi iziqu.
“Siyawufuna umbiko ogcwele ngalesi sitifiketi ukuze sithole isibalo sabo. Sifuna ukubazi bonke othisha abafundisayo ukuthi banaziphi iziqu,” kusho uNkk Hlongwa-Madlala.
Inhloko yomnyango, uDkt Vusumuzi Nzama, ithembise ukuthi bazowenza lo mbiko bawulethe ekomitini kule nyanga.
“Indaba yePGCE isingethwe nguMnyango weMfundo ePhakeme obhekene nezindaba zokuqeqesha. Asikaze sizinike isikhathi sibheke ukuthi bangaki othisha kodwa sizoyibheka indaba yabo,” kusho uNzama.
Uthe zikhona izinhlelo zokuthuthukisa othisha abangenazo iziqu abafundisa ezikoleni zesifundazwe.
Umbiko othulwe ekomitini uveza ukuthi bangu-2 449 othisha abangenazo iziqu ezifanele zokusebenza kodwa abafundisayo.
Umnyango uveze ukuthi unike othisha abangu-500 abafunda e-Unisa imifundaze.
“Kunothisha abangu-55 abafundisa uGrade R abafunda enyuvesi yaseNorth West. Basashoda othisha ezifundweni i-Maths nesayensi nezinye yingakho sikhipha imifundaze iFunza Lushaka ukuze sihehe abafuna ukufundisa lezi zifundo,” kusho umbiko womnyango.