Kuyoze kube nini amaqabane ebulalana?
UKUDLULA emhlabeni kowayenguNobhalaJikelele we-ANC Youth League, uMnuz Sindiso Magaqa, oshonele esibhedlela sekuphinde kwayigqamisa inkinga edlondlobalayo - ukubulalana kwamaqabane.
UMagaqa obeseyikhansela eMzimkhulu wangena esibhedlela edutshuliwe namanye amakhansela asinda kulesi sehlakalo ngoJulayi. Nobengakaboni useyabona ukuthi i-ANC ixabana yodwa futhi amaqabane awasathembani.
Ayikaziwa imbangela yokushona kukaMagaqa. Kuphenywa nezinsolo zokuthi udliswe ushevu ngoba kuthiwa ukhale ngesisu ngaphambi kokuphuma komphefumulo. Kuthiwa ubeseluleme emva kokudutshulwa futhi umndeni ubusubheke ukuthi angaphuma esibhedlela noma yinini.
Kuyinto ejwayelekile e-Afrika ukuthi izinhlangano eziletha inkululeko emazweni azo zigcine zibe nezinkinga, kokunye zigcina zikhishiwe ekuphatheni kodwa lokhu okwenzeka kwi-ANC kudlulele kokuvamile. Le ANC engenye yezinhlangano ezilwele inkululeko yomuntu omnyama eNingizimu Afrika, namhlanje ivumela abantu abamnyama babhuqabhuqane bodwa ngenhlavu ngenxa nje yezikhundla namathenda. Sekuze kwasungulwa iKhomishana ephenya ngokufa kwabantu okunenhlese yezepolitiki ngenxa yokunyuka kwesibalo sosopolitiki ababulawayo. Uze ubone nokuthi inkulu indaba ngalokhu kubulalana, ubona ngakho ukuthi kugcine kungaboshwe muntu.
Into efanayo nendaba yehostela laseGlebelands nalapho abantu bebulawa kungabi ndabazalutho kanti nakhona akekho noyedwa osegwetshiwe kodwa ezweni kuthiwa kukhona ezobunhloli.
Njengabantu baseNingizimu Afrika sibheke ukuthi amalungu e-ANC agxile ekuletheni izidingo kubantu njengenhlangano ebusayo hhayi lokhu kuklwebhana esikubona mihla namalanga.
Sibheke ukuthi sazi ukuthi singabuthemba ubuholi be-ANC nokuthi bungasivikela thina zakhamuzi kodwa njengoba amaqabane eqothana wodwa nje, kusho ukuthi kwathina zakhamuzi asiphephile kulaba baholi.
Ake abaholi be-ANC bazinuke amakhwapha, kuzoze kube nini amaqabane ebulalana? Kumnandi nje uma abantu abamnyama beqedana bodwa kanje?
Duduzekani mndeni wakwaMagaqa.