Sekwakikizelwa izigebengu ngoba abayizibonelo baqhelile
CISHE wonke umuntu unesigebengu asaziyo, mhlawumbe, esiwumngani, yisihlobo okanye esiwumakhelwane. Kunzima ke nokho ukubiza abantu ngezigebengu ungakaze ubabone bentshontsha noma beke baboshwa, bashushiswa base beyagwetshwa.
Kulula ukubiza abantu ngezigebengu ngenxa nje yendlela abagqoka ngayo nezimoto abahamba ngazo. Izikhathi eziningi ubufakazi sisuke singenabo. Kulezi zinsuku abantu bahlukene phakathi kuFacebook ngenxa yokudlula emhlabeni kukaSandile “Chillies” Bhengu waseMlaza, okuthiwa udutshulwe wabulawa ngamaphoyisa esephakamise izandla.
Izinsolo zithi ubanjwe ekutakuta i-tracker yemoto ebiyebiwe.
Uma iyiqiniso indlela abulawe ngayo, yisenzo leso esingalungile, ngeke sikwazi ukuba yizwe lapho amaphoyisa kwayiwona inqwaba yawo eyizigebengu, ezokhetha ukubulala abantu kunokuthi ababophe.
Noma ngubani ophula umthetho unelungelo lokuthwesa icala achaze udaba lwakhe enkantolo. Ngeke ngigxile kakhulu kumfokaBhengu oselele kobandayo, ngoba ngeke esakwazi ukuziphendulela.
Engizogxila kukho yiqhaza lezigebengu emphakathini. Izigebengu yizo ezihamba ngezimoto ezinhle, osisi abahle bayaziwela kuzo, ukotini wokugcina udliwa yizona. Izigebengu eziningi zinogazi, ezinye zinobuntu, ziyakwazi ukuzifaka ezinhliziyweni zomphakathi ngokuba wusizo uma kukhona abaxakekile.
Lokhu kudala ukuthi intsha igcine isibukela kuzo.
Nasemalokishini sinazo izifundiswa. Ngeshwa eziningi zikhetha ukuthutha, ziye kohlala emizini esemigwaqeni efulelwe ngamaqabunga ezihlahla ezikake unqenqema lemigwaqo.
Vele amalokishi ayesungulelwe ukuthi simbondelane ndawonye sonke kuwo. Lelo kwakuyiqhinga likahulumeni wobandlululo elisasebenza ngenkulu impumelelo namanje yize sekuphethe uhulumeni owakhethwa yithi. Yilowo nalowo unelungelo lokuhlala lapho kulingene iphakethe lakhe khona.
Uma kwenzekile izifundiswa zakithi zavakashela elokishini, okuyinto engesiyo imvamisa, azihlali isikhathi eside. Akulula ukuyoqhiphotheka ejoyintini nakoshisanyama usuku lonke uma unezinto ezibalulekile ozenzayo empilweni.
Enye inkinga ngezifundiswa eziningi, azingeneki, ziyazazisa, zizithwele, zibabukela phansi abanye abantu. Lolu hlobo lwezifundiswa aziwusizo lwalutho emphakathini ngenxa yokuthi ukuqhela kwalo ebantwini kuncisha intsha ithuba lokukwazi ukuzibuka njengezibonelo ezinhle.
Bese kuba khona izigebengu ke. Iningi lazo lizibeke phansi, zisondelene nabantu.
Amalokishi ethu adinga amaqhawe amasha. INingizimu Afrika idinga abantu abehlukile abazoba yizibonelo entsheni. Luselude ukhalo esisazolihamba ukulungisa lolu daba ngoba uma kukhulunywa ngobugebengu, akumele nje kugcinwe kulabo abantshontsha izimoto, ababamba inkunzi, abagqekezi nababulali.
Izigebengu ezinkulu zitholakala emahhovisi aheleza umoya obandayo, zihleli ezihlalweni zesikhumba ezijikelezayo.
Izigebengu ezinkulu yilamabhikawozi akwazi ukuthi adudane ngokunyusa intengo yesinkwa ukuze enze inzuzo ngabantu abampofu abaphila ngesinkwa imihla ngemihla.
Kubantu abahlwempu akulula ukuvuka ngalamahlofoyi asazindlubu achelwa ngobisi abe yiyambazi lansuku zonke. Ukunyuswa kwentengo yesinkwa kungafanele, kuwukufela ngamathe ebusweni abampofu nokubashovela emgodini wobuphofu.
Kumele sizibuze futhi ukuthi kwale ANC esiholayo kungani yavumela amalungu ayo ukuthi agqogqoshe uTony Yengeni ngamhla eyoqala isigwebo sakhe secala lokukhwabanisa.
Abantu abafanelwe ukugqogqoshwa ngamaqhawe asuke enze kahle njengoLuvo Manyonga noCaster Semenya, hhayi imigulukudu elahlwe ngamacala. Yebo kuyenzeka amaqhawe omzabalazo awele esilingweni senkece, ngoba nawo angabantu, kepha akumele lokho kugqugquzelwe sengathi sithi enze kahle.
Nanoma ngubani ozigqaja ngokuthi akasona isigebengu kumele azibuze ukuthi yini iqhaza lakhe emphakathini. Ukusonga izandla nokubumba umlomo akuthi shu.
Yingakho nje uma ubhozo wesigebengu usulenga ithikithi emakhazeni, kukikizwa, kushaywa amakhwela, kupiniswa nezimoto. Yingoba awasekho amaqhawe nabantu abayizibonelo ezinhle emphakathini.
Namabandla okuyiwo okufanele ngabe acangcatha onembeza kubantu, asaphenduka isizinda sokukhuthuza amakholwa agajwe wuvalo lwesihogo. Kukhokhwa kukhokhiwe. Ukuxhimfa iBhayibheli sekumba eqolo!
Ukujatshulelwa kwezigebengu kusazoqhubeka emiphakathini yethu ngoba labo okumele ngabe bayizibonelo ezintsha akusondeleki kubo, abathintwa.
Kumele sizibuze ukuthi kungani nemibuthano kahulumeni ihluleka ukunika intsha, nabantu nje abenza kahle emphakathini, isigcawu sokuchaza ngekuzuzile. Okuba phambili nje kuba ngabantu abazonandisa. Uma kungabona abadume ngokugovozela amabhodlela eSavanna Dry, kuba abaziculela into engenamqondo. Ngoba kwayibona abaholi bepolitiki kuyababulala ukufuna ukubonakala besesitayeleni. Uma konke lokhu kungaguqulwa uzoqhubeka umphakathi nokukikizela izigebengu. Yiwona maqhawe asele emphakathini.
USandile Mdadane uyiPhini loMhleli obhekele amaphepha angempelasonto kwiSolezwe