Owokukhuculula iTheku eSiphingo
UMASIPALA weTheku usuzibophezele ekukhucululeni leli dolobha njengoba kuqhubeka umkhankaso wokukhuculula eSiphingo.
Kule ndawo okukhucululwa kuyo kunenqwaba yamabhizinisi asebenzisa amakhemikhali asezindaweni zokuhlala abantu.
Inhloko yophiko olubhekele ukwakhiwa kwezakhiwo nokuthuthukiswa kwazo kuMasipala weTheku, uMnuz Musa Mbhele, uthe lo mkhankaso wezinyanga eziyisithupha uqale ngoJulayi.
Uqhube wathi lo mkhankaso uyingxenye yohlelo lwemeya yeTheku uNkk Zandile Gumede ngokubambisana nemenenja uMnuz Sipho Nzuza lokugcina amadolobha aseThekwini ehlanzekile.
Amavolontiya ayingxenye yalo mkhankaso acosha udoti olahlwe ezindaweni ezingafanele, asika izihlahla ezinde nezitshalwe ezindaweni ezingafanele, ahlanza imihosha, asusa udoti ovale amapayipi ahamba namanzi emvula, apenda kabusha nezimpawu zomgwaqo nokunye.
“Ngesikhathi kubhekwa amadolobha aseThekwini angcolile kutholakale ukuthi iSiphingo singcole kunawo wonke. Omakhenikha bakhanda izimoto ezindaweni ezihlala abantu, amakhemikhali abawasebenzisayo ayingozi emphakathini, uwoyela wezimoto oconsayo ngesikhathi bekhanda uma lina uhamba uyongena emifuleni, ubulale izinhlanzi nezinye izilwane ezihlala emanzini,” kusho uMbhele.
Abadayisa emigwaqewni namatekisi uthe basebenzela noma kuphi, bavale indawo eyenzelwe abahamba ngezinyawo. Ngaphezu kwalokhu uthe babuye basebenzise amanzi ngokungemthetho. “Kunenqwaba yabadayisa emgwaqweni abangenazo izimvume, nabanazo abayilandeli imithetho yokugcina indawo ihlanzekile. Abanqeni ukulahla amakhasi emifino nezithelo, amaphepha nokunye abakusebenzisayo emgwaqweni. Lowo doti ungena emapayipini okumele ahambe amanzi emvula. Ngaleyo ndlela amanzi agcina engamathandala emgwaqweni uma lina kwande nezifo,” kusho uMbhele.
Lo mkhankanso uthe uyingxenye yokuqinisa imithetho elawula ukuziphatha eThekwini i-nuisance bylaws.
Selokhu uqalile lo mkhankaso uthe sebehlawulise abephula umthetho imali esifinyelele kwisigidi.
“Kunezinkampani esizihlawulisile ngokulahla udoti wazo budedengu noma ukusebenza zingenazo izimvume zokwenza amabhizinisi eziwenzayo okuvamise ukuthi kube ngawokudla,” kusho yena.
Uthe kukhishwe izintambo zikagesi nezinye izinto zikagesi ebezixhunywe ngokungemthetho okungu-972 kg emijondolo yakule ndawo.
UMbhele uthe ezinye zezinto abazitholile ngeke zilungiseke ngezinyanga eziyisithupha.
“Sihlela ukuthola ukuthi ngawobani amabhilidi angasanakekelwa akuleli dolobha. Sikhulume nabanikazi bawo, sibheke nokuthi yini engenziwa ngawo,” kusho uMbhele.