Umthelela wenjabulo emshadweni
KUTHIWA basemathubeni okuphila isikhathi eside abahleli kahle emishadweni yabo futhi abajwayele ukugula. Lona wumbiko owethulwe njengoba kuyisonto elikhuthaza imishado engenazihibe elaziwa ngeSA Marriage Week.
UNkk Liezel van der Merwe, ongumsunguli weSA Marriage Week uthe injabulo emshadweni iza nomthelela omuhle nasempilweni. Uthe baningi ongoti abenze ucwaningo bathola ukuthi ukujabula emshadweni kunomthelela omuhle kwezempilo. UNkk van der Merwe wenze isibonelo ngencwadi kaLinda Waite ethi The Case for Marriage ekufakazelayo abashadile baphila isikhathi eside uma bejabulile. Ucwaningo olwenziwe ngo-2013 lwashicilelwa kwiJournal of Clinical Oncology, luveze ukuthi ziyanqandeka izifo kwabashadile uma bejabulile.
“Abantu abashadile noma begula bayashesha ukwelapheka futhi abajwayeli ukusheshe babulawe yizifo,” kusho ucwaningo.
Kuvele nokuthi akujwayelekile ukuthi abathokozile emshadweni babulawe yizifo ezihlobene nenhliziyo nohlangothi. Kuthiwa lokhu kwenziwa ukuthi ukujabula kukhuthaza nokusebenza kahle kwamasosha omzimba.
UNkk Zama Mabaso onguMqondisi kwaFamily and Marriage Society of SA, uthe kuliqiniso ukuthi umshado ongenazihibe wenza baphile kahle nabashadile.
“Ukugula nokhwantalala kuwumthelela wokungajabuli. Kanjalo nasemshadweni abantu abangathokozile bayagula babe nokhwantalala. Umshado onenjabulo yilapho abashadile bekwazi ukukhuluma ngazo zonke izinto basheshe baxazulule nezinkinga zabo,” kuchaza uNkk Mabaso.
Ukhuthaza abantu ngokuthi ukuze bajabule emshadweni akumele babambelane amagqubu kodwa bazijwayeze ukuxoxa nganoma yini. UNkk Mabaso uthe kubalulekile nokuthi abashadile bachithe isikhathi esiningi ndawonye benze nokuzobajabulisa.
ISA Marriage Week igujwa njalo ngoSepthemba kusukela mhla ka-1 kuze kube umhla ka-7.