Ubungozi besifo sikashukela komama
abadla ngayo (type 2), bavamise ukuba nezingane ezizalwa zikhuluphele ngokweqile, zikhule zinjalo kuthi uma zingena esigabeni sokukhula ziqhubeke nokukhuluphala ngokweqile zigcine zingenwa yiso isifo sikashukela u-type2.”
Uqhube wathi umama onesifo sikashukela, onengane enalesi sifo uyehluleka ukuzinakekela ngendlela ngakolunye uhlangothi kufanele anakekele ingane yakhe.
Uthe labo mama bajwayele ukunakekela kakhulu izingane ngokuzinika imishanguzo efanele bakhohlwe ukuthi nabo kumele baye ezikhungweni zempilo. Uthe ezinganeni ezineminyaka engu-10 kuya ku-17 ezizalwa zinalesi sifo kumele kugadwe indlela ezidla ngayo ama-carbohydrates.
“Lokhu kwenzelwa ukuthi kwazeke ukuthi ingakanani i-insulin ezodingeka. Amantombazane uma eqhathaniswa nabafana abanesifo esifanayo anamathuba amaningi okuthi angenwe yizifo zokuzincisha ukudla ezifana ne-anorexia noma i-bulimia. Maningi amathuba okuthi athi efika eminyakeni engu-20 abe enezinkinga zamehlo, uma engakutholanga ukwelashwa angagcina eyimpumputhe,” kusho uDkt Distiller.
UDkt Distiller uthe abesifazane ngokujwayelekile baphila isikhathi eside uma beqhathaniswa namadoda abanesifo esifanayo.
“Owesifazane onesifo sikashukela osekhulile ngaphezu kobuhlungu bokushiywa umyeni wakhe, usuke enegcindezi yokuthi kumele azinakelele njengoba enalesi sifo,” kusho uDkt Distiller.
Abesifazane asebekhulile uthe kunamathuba amaningi okuthi bahlaselwe isifo senhliziyo, ukufiphala kokubona, ukwehla nokwenyuka kwezinga likashukela egazini.