Intukuthelo bexoshwa abadayisa emgwaqweni
BASOLA uMasipala weTheku ngokugweva nezincwadi zezimvume zokuthi bakwazi ukudayisa ngokusemthethweni abadayisi basemgwaqweni basePinetown.
Ngesikhathi Isolezwe lifika kuHill Street ePinetown lifice abadayisi bethukuthele beveva bekhala ngamaphoyisa kamasipala okuthiwa abaxoshe ezindaweni abadayisela kuzo. Amaveni amaphoyisa kamasipala abeqhubeka nokwehla enyuka eqaphe ukuthi akekho yini odayisa ngokungemthetho.
Lo mgwaqo ungeminye enesiminyaminya ngenxa yabadayisi bezimpahla ezihlukene ezinye abasuke bezendlale phambi kwezitolo izolo kodwa bekushaya umoya, iqulu labadayisi limi eduze kwezimpahla ebeziboshwe ziyimfunzana okuvele ukuthi baziqoqiswe ngamaphoyisa abengafuni lutho.
UNkk Thembi Sheshane (40), waKwaDabeka ongumdayisi wasemgwaqweni, uthe imali ayithola ngokudayisa izindwangu zamatafula, izimpahla zangaphansi nokunye uziphilisa ngayo aphinde ondle ngayo izingane ezine.
“Ngiqale ukudayisa ngo2011. Sengisifake kaningi isicelo semvume yokudayisa kodwa kuze kube manje asiphendulwa. Imali esiyithola lapha sondla ngayo imindeni, sirente siphinde sifundise izingane,” kusho uNkk Sheshane.
UMnuz Sifiso Langa (43) waseLindelani othe useneminyaka engu- 15 edayisa umuthi wokubulala amagundane nezingubo zangaphansi, naye uthe ngemali ayithola ngokudayisa ufundisa izingane ezintathu.
“Bathi asenzeni? Bafuna sibambe inkunzi? Kade ngangifaka isicelo sokudayisa ngokusemthethweni kodwa kungathi umasipala uzinikeza abangani. Yonke le minyaka ngilinde imvume, okugcina kwenzeka ugcine usubona ngomuntu ofike kamuva esenompheme ungazi ukuthi kanjani kodwa wena kulokhu kuthiwa linda. Ulinda kanjani ulambile?” kusho uLanga.
Okhulumela uMasipala weTheku, uNksz Tozi Mthethwa, uthe umasipala ubambisene nabezokuvakasha, sebenezinhlelo zokufundisa abadayisi basemgwaqweni abangenazo izimvume nokubaxhasa ukuze bathole izimvume ezindaweni ezingu-7 ezakhele lo masipala.
“Ngokomthetho wabadayisi basemgwaqweni oshaywe ngumasipala ngo-2014, umasipala awukwazi ukuvumela abadayisi abangenazo izimvume ukuthi baqhubeke nokudayisa. Ukuxhasa abadayisi basemgwaqweni, umasipala ukhiphe namathenda okuhlanza nezindawo abadayisela kuzo, anikwa kuphela abantu abanezimvume zokudayisa,” kusho uNksz Mthethwa.
Uthe abanesifiso sokufaka izimvume zokudayisa ngokusemthethweni, kumele bashayele amahhovisi abo abhekelele ezohwebo. AbasePinetown bangashayela ethi 031 9022024, Isiphingo 031 3112768, bese kuthi abaKwaMashu beshayele ethi 031 311 4612.