Uzungeza amalokishi eqwashisa ngokuhlukumeza
SESIZUNGEZA amalokishi siqwashisa ngokuhlukunyezwa kwabesifazane nezingane, isishoshovu somphakathi esesizakhele udumo ngemikhankaso yokuhamba amabanga amade ngezinyawo.
UMnuz Jan Mabuyakhulu, (46) osezakhele udumo ngalo mkhankaso awuqala ngo-2013, uthe ufisa ukwehlisa izibalo zokuhlukunyezwa kwabesifazane nezingane. Lo mkhankaso ajwayele ukuwenza ngokuhamba amabanga amade ezindaweni zasemakhaya, ngaleli sonto uwuletha emalokishini eThekwini.
“Ngibone ukuthi sekunesikhathi eside ngenza lo mkhankaso ezindaweni ezikude. Ngihlele ukuwuletha emalokishini eThekwini ngoba nakhona bukhona ubugebengu nokuhlukunyezwa kwabesifazane nezingane. Ngikhethe amalokishi lapho kunezigameko eziningi zokuhlukunyezwa nokubulawa kwabesifazane,” kusho uMabuyakhulu.
Lo mkhankaso uwuqale ngoMsombuluko eMayville kanti izolo ubeseMlaza. Uzowuphetha namuhla KwaMashu lapho ezobe ehlanganise khona amalokishi okubalwa Inanda neNtuzuma.
“Ngibone ukuthi abanye noma bethanda ukungijoyina kweminye imikhankaso ebengiyenza phambilini, baxakwa amabanga amade. Njengoba ngizungeza amalokishi sihamba amabanga amafishane, okuzokwenza nabahlulekayo emabangeni amade bakwazi ukujoyina. Nginxenxa wonke umphakathi ungijoyine ngoba inhloso ukudlulisa umyalezo,” kusho uMabuyakhulu.
UMabuyakhulu odabuka eMtubatuba, uthe uzoqala omunye umkhankaso ngoNovemba ozohambisana nowaminyaka yonke wokulwa nokuhlukunyezwa kwabesifazaane nezingane, wezinsuku ezingu-16. Wona uzowenza eMzimkhulu nasePort Shepstone.
“Akukho engikutholayo ngalokhu engikwenzayo kodwa kuyangithokozisa ukubona abantu bewamukela umyalezo wami. Ukuhlukunyezwa kwezingane nabesifazane akupheli, yingakho abantu kumele babuye bakhunjuzwe ukuthi balwe nalo mkhuba,” kugcizelela uMabuyakhulu.
Uthe ngesikhathi eqala lo mkhankaso wayegxile ekukhuzeni umkhuba wokudlwengulwa nokubulawa kwezalukazi okuke kwadla lubi esifundazweni.
Useke waqwashisa nangokubulawa kwabanebala elimhlophe akwenze ngokuhamba ibanga elingu-180km esuke eMbazwana eya eManguzi.
NgoJuni wasuka eMtubatuba weza eThekwini ngezinyawo, wajoyinwa nanguNgqongqoshe wezeMpilo esifundazweni uDkt Sibongiseni Dhlomo.