Sekuyaphothulwa ukunxephezelwa
AMAPHOYISA athi aseyaziphothula izinhlelo ngesinxephezelo sikaR1 billion ukuze kukhokhelwe imindeni yabashona eMarikana.
Izikhulu zamaphoyisa ngoLwesibili zitshele amalungu ePhalamende ukuthi imindeni engakakhokhelwa izoyithola maduze imali yesinxephezelo.
ULt-Gen Sally Khan, obhekelele ezomthetho emaphoyiseni, uthe abantu abangu-653 abafake isinxephezelo esifika ku-R1 billion.
Uthe sebexazulule izindaba zabasebenzi basemayini abangu-37 ababulawa ngo-2012.
Uveze ukuthi imindeni yabavukuzi abangu-31 kwengu-37 isisivumile isinxephezelo kangangokuthi sekukhishwe u-R29 million ozonikwa ababethembele kubavukuzi.
Uthe omunye umndeni obumelwe yi-Wits Law Clinic ukwazile ukuqeda ngodaba lwesinxephezelo wathola u-R3 million.
“Abanye abantu babopha amaphoyisa ngokungalandeli umthetho ngesikhathi beboshwa. Ababoshwe ngaphandle kokulandela umthetho bafuna isinxephezelo esiphakathi kuka-R50 000 noR100 000,” kusho uKhan.
Uthe basaxoxisana ukuthi kufanele bathole malini ababoshwe ngaphandle kokulandela umthetho.
Uveze ukuthi bangu-275 abantu ababopha amaphoyisa bewasola ngokuthi abashaya.
Uthe basalinde isinqumo ngalolu daba.
Kulindeleke ukuthi ikomidi eliphethwe nguJaji David Ntshangase liqinisekise ukuthi izinqumo zeKhomishini yeJaji uFarlam ziyenziwa.
USihlalo wekomidi, uMnuz Francois Beukman, uthe sebekulungele ukwenza zonke izinqumo zikaFarlam ngoba sekuphele iminyaka emihlanu kwenzeka isigameko saseMarikana.
UMnuz Zakhele Mbhele weDA uthe umbiko wakamuva ngemibhikisho uveza ukuthi kwengu-14 000 eyenzekayo engu-12 500 isuke ingenalo udlame.
Ugqugquzele amaphoyisa ukuthi aphathe kahle abantu angasebenzisi udlame.