I-DA ayesekwanga ekuchitheni iPhalamende
WONKE amaqembu asePhalamende ayilaxazile iDA emkhankasweni wayo wokuthi kuchithwe iPhalamende ngoLwesibili.
Amalungu ePhalamende angu229 asichithile isicelo seDA njengoba sivotelwe ngamalungu angu-83 kwathi amalungu ayisikhombisa akhetha ukungavoti. I-ANC isole iDA ngokubukela phansi abavoti yathi ayilinde ukhetho lwango-2019 uma ifuna ukungena kuhulumeni.
USotshwebhu we-ANC uMnuz Jackson Mthembu nelungu le-ANC uMnuz Richard Mdakane bathe ngisho amalungu eDA angakuseka ukuchithwa kwePhalamende kodwa kwesekwa yidlazana labaholi baleli qembu. “Izigidi zabantu ezavota ngo-2014 azizona izilima. I-DA kufanele ilinde ukhetho lwango-2019 uma ifuna ukungena kuhulumeni. Akekho obesekayo ngisho abantu abasebenzisana nabo babalaxazile,” kusho uMthembu.
IPhini lomholo we-EFF uMnuz Floyd Shivambu lithe i-DA iyathanda ukubukwa futhi ibukela abanye abantu phansi. “I-DA izibona ingangena esikhundleni se-ANC, ngeke kwenzeke lokho.”
UMnuz John Steenhuisen weDA uthe bafuna i-ANC iphume kuhulumeni ngoba ayizange imthathele izinyathelo uMengameli Jacob Zuma.
UMnuz Narend Singh we-IFP uthe iDA akufanele izenze uNdunankulu waseBritain uNkk Theresa May ofuna ukhetho lusheshe lufike ngoba naye akazange aphumelele.
UMnuz Manzoor Shaik Emam weNFP usole iDA ngokuthanda ukubukwa nokufuna umbuso we-ANC ngenkani.
IPhini likaMengameli we-UDM uMnuz Nqaba Kwankwa lithengeke beseke iDA esiphelelwe amaqhinga ngoba i-ANC izohlakazeka ngoDisemba uma isinokhethi lobuholi.