AbakwaJockey namathuba emisebenzi
INKAMPANI ekhiqiza izimpahla zangaphansi iJockey, imemezele ukuthi izokwandisa amathuba emisebenzi ngokusebenzisana nomsiki wengqephu ongaconsi phansi kubathandi bemfashini uDavid Tlale.
Ubudlelwano bukaDavid Tlale neJockey kuholele ekutheni bakhiqize izimpahla zangaphansi ezifanela abesilisa nabesifazane.
Exoxa neSolezwe, uDavid uthe ukhethe ukusebenzisana nabakwaJockey ngoba efuna ukwenza izimpahla ezigqugquzela amadoda nabesifazane ukuthi bazinakekele futhi bagqoke impahla yangaphansi esezingeni.
Uthe usebenzele ngaphansi kwendikimba ethi, What’s Beneath ukuze abantu bakuqonde ukugqoka izinto zangaphansi ezibakhululayo futhi ezinhle.
Ugqugquzele abantu ukuthi bathenge impahla ekhiqizwe kuleli ukuze bafukule umnotho badale namathuba omsebenzi.
“Uma abantu bethenga impahla ethungwe kuleli njengezimpahla zangaphansi zakwaJockey kusho ukuthi kuzodaleka amanye amathuba omsebenzi. Umnotho uthuthuke bese izwe lisimamama. Yonke into esiyithengayo kufanele siyibheke ukuthi ikhiqizwe kuphi ngoba ukuyithenga kwethu kusho ukuthi sisimamisa umnotho walapho. Ake sisimamise umnotho waseNingizimu Afrika ngokuthenga okwenziwe kuleli,” kusho uTlale.
Izimpahla zangaphansi ezenziwe nguDavid Tlale zethulwe ngokusemthethweni esitolo sakwaJockey esiseGateway, ngesonto elidlule.
Umcimbi wokuzethula ubuhanjelwe ngowayenguMiss SA, ngo-2008, uTatum Keshwar ophinde wakhangisa ngezimpahla zabesifazane zangaphansi.
AbakwaJockey bathe amathuba omsebenzi azodaleka uma abantu bethenga kakhulu lezi zimpahla zangaphansi.
Uthe uma kwanda amaoda kuzofanela ukuthi baqashe abesifazane abaningi emafemini abo.
UNkk Jenne Carter obhekelele ukukhangisa kwemikhiqizo yakwaJockey uthe, kuyabathokozisa ukukhiqiza impahla esezingeni lomhlaba nomsiki wengqephu ongaconsi phansi.
“Baningi abantu abenze konke lokhu kwaba impumelelo. Kuyasithokozisa kakhulu ukusebenzisana nabantu abafana noTlale, abenza umkhiqizo wethu uthokozelwe yiwo wonke umuntu.
“Okumnandi ukuthi ngalo mkhiqizo baningi abakwazi ukondla emakhaya nabathola amathuba emisebenzi,” kusho uCarter.
Inkampani yakwaJockey izinze eMngeni, eThekwini.
UNkk Carter uthe banefemu abathunga kuyo, baphinde babe nesitolo abadayisela kuso.
“Inqwaba yabasebenzi abavela emazingeni ehlukene empilo esibaqashile.
Inkampani yasungulwa ngo-1951 ngenhloso yokwenza izimpahla zangaphansi zabesilisa, abesifazane nezingane ezisezingeni lomhlaba,” kusho uNkk Carter.
Uthe abasebenzi babo bayabathuthukisa njengoba abanye bebaqhuba esikoleni, abanye bebafundisa amakhono.