UMtawarira uhlale elambele ulwazi: Proudfoot
UKUQHUBEKA nokuzimisela ukufunda okwenziwa umakadebona wamaBhokobhoko, uTendai “Beast” Mtawarira, kuphoqa abanye abadlali ukuthi bangabi nalo ithuba lokucasha ngesithupha, ngokusho komunye wabaqeqeshi beqembu lesizwe uMatt Proudfoot.
UProudfoot usho lokhu ngoLwesibili lapho iqembu lesizwe lizinze khona ngaphambi komdlalo omqoka ne-Australia ngoMgqibelo ngo-12 emini ePerth, e-Australia, ngaphansi kweRugby Championship. Ngokusho kukaProudfoot, ukuzinikela kukaMtawarira kunomthelela omuhle kwabanye abadlali.
Emdlalweni wangoMgqibelo uMtawarira uzobe edlala umdlalo ka-93 kumaBhokobhoko okumenza kube uyena umdlali oselimele kaningi ukubedlula bonke abakhona eqenjini lika-Allister Coetzee.
“Uselidlalele amahlandla awu-92 izwe lakhe. Kusemqoka ukuthi sikunake lokho futhi sikuhloniphe ngoba uyena oselimele ukubedlula bonke abakhona ekhempini izwe lakhe. Nakuba kunjalo kodwa usaqhubeka nokulambela ulwazi. “Kufanele ngabe uzithwele ngoba usekubone konke embhoxweni womhlaba kodwa inhlonipho nokuzihlupha ngolwazi olusha kushiya laba abanye bengenalo ithuba lokucasha ngesithupha. Lokhu kuwusizo eqenjini futhi njengoba siqhwakele nje, sizimisele ngokuqhubeka nalokhu ngoba sibophele abantu abafana noMtawarira esikwatini sethu,” kusho uProudfoot.
Komunye umdlalo weChampionship okhona kule mpelasonto, iNew Zealand izovakashelwa yi-Argentina ngawo uMgqibelo ngo-9 ekuseni eYarrow Stadium, eNew Plymouth, Taranaki, eNew Zealand.
Njengoba zibondiwe ePerth, naseNingizimu Afrika isingena kwelinye igiya iCurrie Cup. Kuzokuthi kusasa iCell C Sharks, eqhwakele, ivakashele iSteval Pumas eMbombela Stadium, eNelspruit, ngo-5 ntambama.
Ezimnandi kuSharks ezokuthi kubuya uCurwin Bosch obekuMabhokobhoko. Uzothatha indawo kaGarth April yena ozoshenxela ebhentshini bese kuthi uBenhard Janse van Rensburg, oyisithandwa somqeqeshi, azithole engaphandle kwesikimu sosuku.
Ukunqoba kweSharks lapho kuzophinde kuwakhuphule amathemba ngokuthi iqembu laseThekwini yilona elizogcina lidle umhlanganiso kulo mqhudelwano ohlonishwa umhlaba wonke kwabasondelene nebhola lombhoxo.