Kuboshelwe izingqungqulu emunxeni womdlali ovelele
KUMINYENE utshumo emunxeni womdlali ovelele kuma-KZN Sports Award njengoba kuboshelwe abadlali abashaye into ecokeme emikhakheni yabo.
Le miklomelo izoba seNkosi Albert Luthuli Convention Centre (ICC), eThekwini ngoLwesihlanu oluzayo.
Lo mklomelo uzobangwa nguBongiwe Msomi ongukaputeni weqembu lesizwe lakuleli leNetball, amaProteas futhi ogijima e-England, uKeshav Maharaj, Imran Tahir no-Andile Phehlukwayo bobathathu abagijima kumaDolphins nakumaProteas. Kukhona noBongmusa Mthembu okhale wemuka nesicoco seComrades Marathon, uHenri Schoeman noSebastian Crawford abenza i-Triathlon, uJean-Luc du Preez odlala kwiCell C Sharks, Denisha Devnarain noChloe Tryon abadlala ikhilikithi, Tyrone Pillay ongumsubathi, Hank McGregor odalala iCanoeing.
Umdlali ozodla umhlanganiso uzohlabana ngo-R30 000. Lo mklomelo yiwona kuphela ovotelwayo kwazise eminye izoqokwa ngamajaji.
Le miklomelo izokwakhiwa yiminxa engu-22 okuzobalwa kuwona noweLifetime Avhievement Award. Laba badlali abaqokiwe bafakwe emklomelweni womdlali ovelele ngemuva kwezimanga abazigile ngo-Agasti wonyaka odlule kuze kube ngoJulayi 31 kulo nyaka.
Umklomelo womdlali wonyaka uzovotelwa ngabathandi bezemidlalo. Ukuze ukwazi ukuthumela umqhafazo ngempumelelo kumele ushaye u-KZN AWARDS bese ufaka igama lo mdlali umqokayo ku-33258. Ukuvotwa kuzovalwa ngo-12 ebusuku ngoSepthemba 15. Umqhafazo ubiza u-R1,50.
UNgqongqoshe wezeMidlalo, ukuNgcebeleka namaSiko uBongi SitholeMoloi uchaze ngobumqoka bale miklomelo esitetimendeni esithunyelelwe abezindaba wathi: “Sesiphinde safika leso sikhathi lapho sichoma khona uphaphe lwegwalagwala abadlali besifazane nabesilisa abashaye into ecokeme ngokuphephezelisa phezulu ifulegi lesifundazwe kuzwelonke nasezingeni lomhlaba. Le miklomelo ihambisana nenjongo yethu yokugcina ezemidlalo zisezingeni eliphezulu ngokuba ngomakhonya.
“IKwaZulu-Natal yaziwa ngokhiqiza abadlali bezemidlalo abaseqophelweni eliphezulu. Ngokwenza le miklomelo sihlose ukugqugquzela abadlali bethu bezemidlalo ukuthi baqhubeke nokukhonya.”