UBaxter uzivikele izinqumo ngabadlali

UBaxter uqale umdlalo phambili ebophele uBradley Grobler noTokelo Rantie. Esiswini iphinde yangabi khona indawo kaJali eqala ngoDean Furman noHlompho Kekana. UKekana uthathe indawo kaBongani Zungu owayeqale umdlalo noFurman emlenzeni wokuqala ekuhambeni.

Kudume iMabhida ngesikhathi uJali ezilula ngaphandle kwenkundla eselungiselela ukungena esiwombeni sesibili. Ngaleso sikhathi bese konakele iBafana isilandela ngemuva ngo 2-0. Abalandeli bakhombise ukumjabulela uJali ongene endaweni kaBradley Grobler. UJali uyena oshaye igoli lokubika. Lolu bekuwushintsho lwesibili lukaBaxter, njengoba eqale ngokudonsa uThemba Zwane kwangena uLebo Manyama.

Ebuzwa uBaxter ukuthi ucabangani ngokungahlangani kwabagadli aqale ngabo, usheshe wayikhalima intatheli, wathi: “Ngathi ubuka kakhulu ithelevishini. Sidlale ngabagadli abathathu. UKeagan (Dolly) ubengomunye wabagadli. Kumele uqale uqonde indlela ebesiyidlala ngaphambi kokuthi uthi ayizange isebenze.”

Uthe inhloso bekuwukuhlasela ngabadlali basemuva ezinhlangothini bese, uDolly ejoyina kuRantie noGrobler phambili. Nokho lokhu akuzange kubonakale yize ekhona amabhola awele uGrobler kodwa wadlala ngomsebenzi.

Ngesikhathi efaka uJali, enkundleni bekusekhona uKekana noFurman. Lokhu abanye bakubone njengokugqisha isisu ngenhloso yokuvala izitha.

“UJali bengimfaka njengomunye wabadlali abahlaselayo. Besilandela ngemuva ngo 2-0. Bekuyisikhathi esifanele sokumfaka. Abanye bazothi ngenze iphutha, bathi ngimfake ngesikhathi esingafanele futhi ngifake umdlali ongafanele,” kusho uBaxter.