UDa Gama uxoshwe yiSafa nge-email
UXOSHWE nge-email u-Owen Da Gama obecija iqembu lesizwe laseNingizimu Afrika lika-Under 23 aphinde abe yiphini lowayengumqeqeshi weBafana Bafana, u-Ephraim “Shakes” Mashaba.
Isikhulu esiphezulu kwiSouth African Football Association (Safa), uDenis Mumble, usho lokhu ngemuva komdlalo weBafana neCape Verde eMoses Mabhida Stadium, eThekwini.
IBafana ithelwe othulini yiCape Verde ngo 2-1 eMabhida. Amagoli angcwabe iBafana abaselwe enethini nguGarry Rodrigues kwathi elokubika lashaywa nguAndile “Gattuso” Jali.
“UDa Gama simkhululile ngoba umqeqeshi (uBaxter) usitshelile ukuthi ufuna ukusebenza nobani. Uzosebenza nomqeqeshi uThabo Senong noQuinton Fortune. Kunohlelo esinalo futhi uSenong uyalazi. Asifuni ukubulala umgqigqo. Umqeqeshi uDa Gama ngingakuqinisekisa ukuthi simkhululile. Izinkontileka zabaqeqeshi zihambisana nezamaphini lokho kucacile. Umqeqeshi omusha nguyena ozithathela isinqumo sokuthi ufuna ukusebenza nobani. Zonke lezo zinto zibhaliwe kwinkontileka yomqeqeshi. UDa Gama uyazi ngalokho futhi simtshelile ukuthi siyamkhulula,” kusho uMumble.
UDa Gama ukuqinisekisile ukuthi uxoshwe nge-email.
“Ngithole i-email ingazisa ukuthi angiselona ilungu leSafa. Lokhu kungethusile ngoba kade ngangizama ukuhlala phansi neSafa sibhunge ngodaba. Ngicele imihlangano emine kodwa uMumble walokhu ethi ulinde umengameli (uDanny Jordaan). Kusasa (namuhla) ngizohlangana noMumble angichazele kahle ngoba awukwazi ukuqhamuka usuzongixosha nge-email.” Isikhala sikaDa Gama sizothathwa nguQuinton Fortune owazakhela igama elibi ngokuchizela iBafana eminyakeni edlule.
“UFortune sesimfakile ethimbeni lethu labaqeqeshi. Izingxoxo zisaqhubeka ngezinye izinto azozenza eqenjini. Yena ngingakuqinisekisa ukuthi uyabuya. Usazothi ukuqhubeka nokuzinza eManchester. Uzobe ephansi phezulu esibhekela abadlali bethu abagijima e-Europe. Ngemuva kwalokho uzobe esesithumelela umbiko ngendlela abenza ngayo.
“Njengamanje sesizohlala phansi sibone ukuthi yiliphi iqembu elincane lesizwe esingamfaka kulona. Nokho leyo nto sisazoxoxa ngayo. Ngeke ngidalule ukuthi uzocija liphi iqembu elincane ngoba sisaxoxa ngalokho. Uzokhumbula ukuthi uQuinton usenza izifundo zakhe ze-Uefa Pro Licence. Uyaqonda ukuthi kumele athole amava. IBafana ijwayele ukuthi idlale kanye ngemuva kwezinyanga ezintathu, yingakho uFortune sifuna athole iqembu lesizwe elincane,” kusho uMumble.
UBaxter uphinde walanda no-Andre Arendse ukuzopheka onozinti.
“Izinkontileka zamaphini abaqeqeshi zihambisana nezinkontileka zabaqeqeshi. Ngokujwayelekile abaqeqeshi sibanika izinkontileka zeminyaka emine. Sikala ngekhalenda leNdebe yoMhlaba esuke idlalwa kuze kube yiNdebe yoMhlaba elandelayo. Leli khalenda leNdebe yoMhlaba liyaphela ngoJulayi 2018. Njengamanje uFortune useyilungu leSafa kuze kuphele leli khalenda le Ndebe yoMhlaba.
“Ngemuva kwalokho umqeqeshi uzokwenza izincomo mayelana nokuthi usafuna yini aqhubeke. Ezinye izingwazi ebeziseqenjini lesizwe zizoqhubeka nokuba khona. Sisazoqhubeka nokubiza ezinye. UNeil Tovey uyinhloko yethimba losomaqhinga, uLucas Radebe usethimbeni elithatha izinqumo ezithinta amaqembu esizwe kanti uHelman Mkhalele useqenjini lesizwe likaUnder 20,” kusho uMumble.
Ebuzwa uMumble ukuthi akesabi yini ukuthi uDa Gama uzobathathela izinyathelo zomthetho uthe ngeke zibe khona izinkinga.