Uthembe ukuvunwa umphumela wezitha
USALE emincele ukuvunwa umphumela wezitha umqeqeshi weBafana Bafana uStuart Baxter ngemuva kokugotshelwa ekhaya yiCape Verde kowokuhlungela ukuya eRussia kwiNdebe yoMhlaba ngo-2018.
UBaxter obekunzima nokukhuluma into ezwakalayo ngemuva komdlalo, ukusho lokhu ezama ukuchazela abezindaba ngokuholele ekutheni iqembu lakhe ligcine lihlulelwe ekhaya ngo 2-1 eMoses Mabhida Stadium, eThekwini, ngoLwesibili ebusuku.
Okwenze kwamuncu kakhulu wukuthi lona bekuwumdlalo wesibili kulandelana uBaxter ehluleka ukushaya iCape Verde kule midlalo. Ngempelasonto edlule iBafana ishaywe iqembu elifanayo ngo 2-1 ekuhambeni. UBaxter neqembu lakhe babuyele kuleli bethembisa ukubuyisa izinduku nokubuyela endaweni engcono embangweni wokuya eRussia kodwa ngoLwesibili ebusuku izinkulungwane zabalandeli ebeziseMabhida zisale zidangele. UGarry Rodrigues ushaye amagoli amabili eCape Verde esiwombeni sesibili, kwathi u-Andile Jali oqale ebhentshini washaya elomthobanhliziyo.
“Ngiphoxekile, ngidumele. Kunzima nokubona ukukhanya, ngingasayiphathi eyokuya eRussia. Angikaze ngiphoxeke kanje ngenxa yebhola. Esiwombeni sokuqala bekungekubi kakhulu kodwa ngemuva kokungenelwa yigoli kudingeke ukuthi sishintshe. Ngicabanga ukuthi sibaphe i-free kick elula futhi ukube igoli lethu sisheshe salithola besingakwazi ukudlala kube ngu 2-2. Ngiphoxekile, manje sekumele sithembele kweminye imiphumela,” kusho uBaxter.
Amanye amaqembu abaqhathwe nawo kuGroup D, iBurkina Faso neSenegal bagcine bebambene ngo 2-2. IBurkina Faso inyukele emaphuzwini ayisithupha, alinganayo neCape Verde, iSenegal inamahlanu kuthi iNingizimu Afrika ibe semsileni ngamane. Lo mphumela yiwona okufanele ukuthi uzonikeza uBaxter inhlansana yethemba ngeRussia.
Ngo-Okthoba iBafana izodlala neBurkina Faso kuleli kuthi kowokugcina iye eSenegal ngoNovemba. Kumele inqobe le midlalo yomibili okuzoyibeka kumaphuzu ayishumi bese ithandazela ukuthi ivunwe imiphumela yawo uma esebhekene neCape Verde. Emidlalweni edlule iBurkina Faso neSenegal baqoqe amaphuzu agcwele kwiCape Verde.