Sebemisiwe onogada be-ANC abakwi-video
ngayo. Asihambisani nabantu abanodlame nabaphatha kabi izikhali. Sicele inkampani yabo ukuthi ibathathele izinyathelo ngoba i-ANC ibaqashe besuka kwenye inkampani,” kusho uNtuli.
Ebuzwa ukuthi ngabe impilo yakhe isengcupheni njengoba egadwa ngemijojantaba yezibhamu ezivamise ukubonakala emarenke amatekisi lapho kuqashwe khona osomatekisi abafunwa yizinkabi, uNtuli uthe akathandi ukuphawula ngokuthi impilo yakhe isengcupheni noma cha kodwa onogada abaziphathi izibhamu ezinkulu uma bemgadile.
“Sizophenya ukuthi i-video yathathwa kuphi kodwa esisakutholile wukuthi yathathwa kudala, ngangingekho lapho futhi akekho umholi we-ANC ababemgadile ngaleso sikhathi. Asihambisani nendlela abaziphethe ngayo futhi asibafuni abantu abakhuluma kabi basabise ngokubulala,” kusho uNtuli.
Uveze ukuthi bazophenya ukuthi yathathwa nini i-video nokuthi kwakwenze njani ngesikhathi iqoshwa ngoba ithunaza isithunzi senhlangano.
Uthe ngaphambi kokuthi baqashe onogada bayaye bazichazele izinkampani zonogada ukuthi bafuna abantu abanjani ngoba ababafuni abaphatha imijojantaba yezibhamu.
Uphethe ngokuthi abahambisani nodlame futhi ababadingi onogada abadlala kabi ngezibhamu ngoba ziyabulala. I-ANC KwaZulu-Natal ibagxekile labo nogada abavela kwi-video besabisa ngokuthi “kuzoshuba namhlanje” bese bekhokha izibhamu. Esitatimendeni esithunyelwe kwabezindaba i-ANC ithe iyaziqhelelanisa nezigameko zodlame futhi ifuna bathathelwe izinyathelo ngumqashi wabo. “Asihambisani nabantu abaphatha izikhali budlabha. Sifuna inkampani yabo ibaqondise ubugwegwe ngoba into abayenzayo ayinambitheki neze,” kusho i-ANC.
UMnuz Dean Macpherson weDA uthe bashaqekile ngokubona i-video yonogada bakaNtuli bedlala ngezibhamu bethi ‘kuzofa inja’.
“Isibhamu esiphethwe ngenye indoda yi-AK47 okuyisibhamu esingekho emthethweni eNingizimu Afrika. Esizibuza kona wukuthi ngabe le video ayihlangene yini nokubulawa kosopolitiki okuqhubeka KwaZuluNatal. Sicela i-ANC iphenye ngale video nokuthi ngabe ngubani owayesatshiswa, wabulawa yini nokuthi izibhamu zabo azithinteki yini kwezinye izigameko,” kusho uMacpherson.
Uthe bese kuyisikhathi sokuthi i-ANC ilungise udaba lokubulawa kwabantu iyeke ukudedela amadoda adlala ngezibhamu.