Bavale ihhovisi bebhikishela ikhansela
SEKUPHELE isonto amalungu omphakathi esigcemeni sakwa-C KwaMashu evale amahhovisi ekhansela, alisona ngenkohlakalo nokuzenzela.
Kusuka kuqale isonto amalungu omphakathi ayabhikisha ngaphandle kwehhovisi lekhansela, athi awasalifuni. UNksz Mamane Xulu oyikhansela ku-ward 40, wabekwa emuva kokhetho lohulumeni basekhaya ngo-Agasti nyakenye. Isolezwe lifike izolo amalungu omphakathi amanye egqoke izikibha ze-ANC, ebhikisha ngaphandle kwehhovisi lekhansela, ephethe izingqwembe ezinemibhalo eligxibhayo.
UNksz Sibongile Young onguNobhala we-ward, uthe ikhansela lizithathela izinqumo ngaphandle kokubonisana nekomiti.
“Aliwavakasheli amaward, lihlala ehhovisi, kube nzima kubantu abangakwazi ukufinyelela kulona. Nokukhethwa kwalo kwaba nepolitiki eningi ngoba umphakathi wawungaphakamisanga igama lalo,” kusho uNksz Young.
Uthe bavale ihhovisi ngoLwesihlanu ngoba bafuna ubuholi besifunda bubanake. Uthe ngoLwesibili bathenjiswa ukuthi kuzofika ubuholi okubalwa uNobhala uMnuz Bheki Ntuli kodwa babuye batshelwa ukuthi abaziyele ehhovisi lesifunda, bangakwazi.
Elinye ilungu lekomiti, uNksz Hlengiwe Ngobese, lithe umphakathi awuneme ngekhansela ngoba aliwenzi kahle umsebenzi. Uthe ikhansela alifuni ukusebenzisana nekomiti elibekiwe ngoba lalifuna kufakwe abathandwa yilona. Akuqali ukuthi umphakathi ukhale ngaleli khansela. Phakathi nonyaka lasolwa ngokususa ikhonteyna ebisetshenziwa njengomtholampilo nehhovisi elingumahamba nendlwana. Ezinye izinsolo ezibhalwe ohlwini lwezikhalo ezibhekiswe ekhanseleni, ngezokudayisa umhlaba ngokungemthetho. Lisolwa nangokufuna ubufakazi bobulungu beqembu uma kudingeka abazoqashwa emphakathini. Lisolwa nangokudayisa ngokungemthetho izindlu ezimbili okubalwa nebihlala izintandane.
Kuthintwa uNksz Xulu uziphikile zonke lezi zinsolo. Uthe uzizwa engaphephile ngoba sekuyacaca ukuthi kunabantu abangamfuni. Uthe laba ababhikishayo yiqeqebana elalifuna kuwine ozimele okhethweni lwango-Agasti.
“Ihhovisi balivalile bashintsha nokhiye, kumanje angikwazi ukuya khona. Ngagcina ngoLwesihlanu ehhovisi, okungiphatha kabi wukuthi abantu abakwazi ngisho ukuthola izincwadi. Uma abantu bengakufuni bakubheca nganoma yini, kusho ikhansela.
Lithe alikaze libizelwe umhlangano litshelwe ngezikhalo umphakathi onazo. Ikhansela lithi lizwe kuthiwa alifuni nomsebenzi, ekubeni akulona eliqasha abantu.
UNksz Xulu uthe uselinde ubuholi ukuthi bulungise udaba. UNtuli akalubambanga ucingo, wathunyelelwa iSMS ayiphendule ngokuthi intatheli ayizifikele emahhovisi e-ANC.