Bakhaliswa amakhompyutha angasebenzi
BAFUNA kungenelele uNgqongqoshe wezokuThuthukiswa koMphakathi eNingizimu Afrika, uNksz Bathabile Dlamini, abantu bezindawo ezakhele iPinetown osekuphele isonto bebuyiselwa emuva ngoba kuthiwa amakhompyutha akwaSouth African Social Security Agency (Sassa) awasebenzi.
Abafundi beSolezwe abacele ukungadalulwa bathe baya emahhovisi asePinetown ngoba bengasitholanga isibonenelo sezingane zabo.
Isolezwe lithole ukuthi isibonelelo sivinjwe wukuthi kunemininingwane edinga ukuvuselelwa kabusha kumakhomyutha akwaSassa.
“Ngisuka eClermont ngigibele ngiye kwaSassa ePinetown kodwa sekuphele isonto kuthiwa angibuyele ekhaya ngoba i-system ayisebenzi. Angazi yi-system yani le abakhuluma ngayo,” kusho isakhamuzi saseClermont.
Omunye uthe bekufanele ayovuselela isibonelelo sabazukulu bakhe kodwa akakwazanga ngenxa yokuthi amakhompyutha awasebenzi.
“Sicela kungenelele uNgqongqoshe wezokuThuthukiswa koMphakathi, uNksz Bathabile Dlamini, ngoba asikuthengile ukudla kwezingane ngenxa yamakhompyutha angasebenzi. Iyasisiza le mali kahulumeni, uma bethi amakhompyutha awasebenzi asazi sizozithengela ngani izingane,” kusho owesifazane.
UMnuz Vusumuzi Mahaye, ophethe ezokuxhumana kwaSassa KwaZuluNatal, uthe bayazi ukuthi uhlelo lwamakhophyutha abo kalusebenzi futhi bayaxolisa ngenkinga edalwa wukungasebenzi kwawo.
“Amakhompyutha awasebenzi ezindaweni ezehlukene KwaZulu-Natal ngenxa yohlelo lwethu lwamakhompyutha. Sicela abantu basibekezelele ngesikhathi sisalungisa lolu hlelo. Abantu siyabasiza ngokuthi sibhale phansi abakudingayo futhi sizobazisa uma konke sekulungile,” kusho uMahaye.