Bekuzwakala ngengoma uma kukhona uMagaqa

eseyilungu le-ANCYL.

Uhlale unyaka owodwa eyilungu elijwayelekile wase eqokelwa ukuthi abe ngusihlalo wegatsha le-ANCYL eBisi.

Usebenze kakhulu noMnuz Vukani Ndlovu oseyilungu le-EFF, ubeyiPhini likaNgqongqoshe wezeMfundo KwaZulu-Natal uMnuz Mthandeni Dlungwane ngesikhathi esengusihlalo we-ANCYL KwaZulu-Natal.

UMagaqa unyuke njalo waze wagcine esengunobhala jikelele we-ANCYL kuzwelonke ngaphansi kukaMnuz Julius Malema owayengusihlalo wayo.

Ngo-2012 i-ANCYL kaMalema noMagaqa yasolwa ngokushukumisa i-ANCYL nokufuna ukuletha ushintsho ngenkani kwi-ANC.

Kwaba necala lokuqondiswa ubugwegwe kanti uMagaqa noMnuz Floyd Shivambu oseyiphini lomholi we-EFF njengamanje bajeziswa ngokuthi bamiswe unyaka kwi-ANCYL.

UMalema wagcina ngokuxoshwa kanti uMagaqa wayelokhu emncenga ukuthi makabuyele kwi-ANC.

UMagaqa ubekuthanda ukucula uma kunemihlangano nemigubho ye-ANC. Iculo ayelithanda kakhulu ngelithi Yithi Amaguerilla kanti njalo uma kukhona yena bekuzwakala ngengoma kumaqabane.

Yize amiswa kwi-ANC akazange aye kwelinye iqembu njengoba edutshulwe ephuma emhlanganweni wegatsha lakhe eliseBisi, eMzimkhulu, wagcina ngokushona.

UMagaqa obeyikhansela kuMasipala waseMzimkhulu ushiye emhlabeni inkosikazi yakhe uNksz Gugu Thobela nezingane ezintathu.

Uzofihlwa ngesonto elizayo eMzimkhulu.