OweMaritzburg ugwema eyomlando ngowamanqamu
UMQEQESHI weMaritzburg United, uFadlu Davids, ugwema eyomlando angase aziqophele wona ngokufaka iMaritzburg United kowanqamu weMTN8.
ITeam of Choice izobhekana neSuperSport United emdlalweni womlenze wesibili eHarry Gwala Stadium, eMgungundlovu, kusasa ngo-8 ebusuku. Kowomlenze wokuqala ekuhambeni iMaritzburg idlale ngokulingana ngo 1-1 naMatsatsantsa a Pitori okuyibeka ethubeni lokudlulela kowamanqamu. ITeam of Choice idinga ukuthi iSuperSport ingalishayi igoli eHarry Gwala ukuze idlulele kowamanqamu okokuqala emlandweni wayo.
UDavids, owayengukaputeni weMaritzburg, angaba ngumqeqeshi wokuqala ukufaka leli qembu kowamanqamu selokhu ladlala kwiPremiership.
“Lokhu kumayelana nabadlali hhayi mina. Ekuqaleni kwesizini ngesikhathi sisekhempini ePotchefstroom, sizibekele esifuna ukukuzuza kule sizini. Abadlali bangitshelile ukuthi bafuna ukudlala kowamanqamu. Kubukeka “kulula” ukuwina imidlalo emibili bese singena kowamamqamu. Sibhekene nalokho manje. Ukufinyelela kowamanqamu kuzoba yinto enkulu eqenjini nakubadlali. Yigxathu lokuqala ukungena kowandulela owamanqamu, uma sesifike khona sizofisa okunye,” kusho uDavids.
Nakuba konke kuvuna iMaritzburg kodwa uDavids uthe uyabuqonda ubunzima bokubhekana neSuperSport eyaziwa ngokuzitamuzela izindebe eNingizimu Afrika. Amatsantsantsa asanda kuqopha umlando ngokuba yiqembu lokuqala kuleli ukuvikela indebe yeNedbank Cup.
“Kufanele siqaphele indlela esizodlala ngayo. Asikwazi ukuvele sihlasele, sizivule emuva. Siyazi ukuthi igoli leSuperSport lingasho ukuvuleka komdlalo ngeqembu elinganqoba. Ngakolunye uhlangothi sifuna ukuvikela u-0-0 kodwa uma beshaya igoli umdlalo uyashintsha,” kusho uDavids.
“ISuperSport iyaziwa ngokuwina izindebe futhi inabadlali abasezingeni eliphezulu abayingozi, ngisho nasebhentshini. Silindele ukuthi uBrockie (Jeremy) adlale. ISuperSport inezindlela eziningi zokuhlasela.”
Amathikithi omdlalo atholakala e-Ticketpro, ezitolo zakwa-CNA, Edgars, Jet nezakwaSpar.