Imibuzo ngolaka lukaJordaan ngeBafana
KUSHIYE imibuzo ukubhoka ngolaka kukamengameli weSafa, uDanny Jordaan, uma ebuzwa ngoLwesibili ebusuku ngomdlalo iBafana Bafana engase iwuphinde ngoba unondweba owayewuphethe leli qembu libhekene neSenegal kuhlungelwa iNdebe yoMhlaba waxoshwa esolwa ngokupheka imiphumela.
Iningi selililahlile ithemba ngamathuba eBafana okuya eRussia ngozayo. Ngokomlando weFifa, akukho okungavimba le nhlangano ukuthi ishaye umthetho wokuthi umdlalo uphindwe. UJoseph Lamptey waseGhana obewuphethe iBafana inqoba ngo-2-1 kwiSenegal ngoNovemba nyakenye ePolokwane, wagcina exoshiwe yiFifa imsola ngokupheka imiphumela.
Ukuziphatha kukaJordaan kuqale ukunakeka iFifa isimemezela ukuthi lo mdlalo uphindwe ngoNovemba okuyinyanga obekuvele iBafana izovakashela ngayo iSenegal kowokusonga amaqoqo.
Kulowo mdlalo lo nondweba waseGhana wabeka iphenathi engacacile iBafana eyanqoba ngayo kowokuvula eyokuhlungela iNdebe yoMhlaba.
Ngo-2005, iFifa yake yawushaya umthetho wokuthi umdlalo owawuphakathi kwe-Uzbekistan neBahrain awuphindwe ngoba yaqale yathola unondweba ukuthi unemikhonyovu eminingi. Kwathi uma iFifa isiphinde ibhekisisa kahle indlela umdlalo ohambe ngayo yashaya umthetho wokuthi azibuyele enkundleni. Kusengenzeka lokhu kuphinde kwenzeke yinqobo uma iFifa ithola ukuthi akuyena unondweba kuphela obekhona kulo mkhonyovu kepha umdlalo wonke ubuphekiwe.
Esikhundleni sokuchazela isizwe, uJordaan ubhoke ngolaka wakuphika ukuthi iFifa ingawushaya umthetho wokuthi umdlalo awuphindwe.
“Ngeke ngiyiphendule le nto ongibuza yona ngoba akekho ongazi ukuthi isinqumo sikanondweba siwujuqu. Khumbula ukuthi uDiego (Maradona) wase-Argentina washaya igoli ngesandla kodwa umdlalo awukaze uphindwe. Kwaba yisimo esifanayo eminyakeni edlule uThierry (Henry) efaka iFrance kwiNdebe yoMhlaba ngegoli lesandla kodwa lowo mdlalo awukaze uphindwe. Angazi ngempela ukuthi kungani kufanele ngiphendule into engekho,” usho kanje kwiMetro FM.
Akasazimisele manje ngokukhuluma uJordaan njengoba iFifa isinqumile. Kuthintwa yona iSafa ngalokhu uDominic Chimhavi uthe: “Isisithintile iFifa. Njengoba isitatimende abasikhiphile sisho nje, basalumunyunga lolu daba ababhekele ezomthetho. Isinqumo abazosithatha bazosimemezela. Okwamanje lolu daba lukuNorman Arendse wezomthetho kwiSafa.”
Elayizolo lishone iFifa isicacisile ukuthi iNingizimu Afrika neSenegal bamsulwa kulolu daba, inkinga nje yaba kunompempe.