Ngizinikele emahlayeni: Skhumba
USOMAHLAYA ohlabane ngendodo yeComic Of The Year kumaSavanna Comic’s Choice Awards abeseGold Reef City ngoMgqibelo, uSkhumba Hlophe, uthe uzinikele ngakho konke emahlayeni.
Ngaphandle koweComic of the Year, uSkhumba uphinde wahlabana ngendondo yeFlying Solo Award okuyindono ayithola nanyakenye.
KoweComic of the Year ubeqhathwe noLoyiso Gola, Celeste Ntuli, Carvin H Goldstone noKagiso KG Mokgadi.
Imiklomelo bekungokwesikhombisa ikhona nonyaka.
“Ngizinikele ngakho konke nangenhliziyo yami kulokhu. Sengenze amahlaya iminyaka ewu-10 futhi bengisebenzela iSAPS iminyaka engu-13 ngaze ngayeka ngoDisemba ngonyaka odlule,” kusho uSkhumba.
Embuthweni wamaphoyisa ubengumabhalane.
Uthe izindondo zakhe ngezabo bonke abantu basemalokishini wathi nabo bangakwazi ukulandela ezinyathelweni zakhe baphumelele.
Ekhasini lakhe le-Instagram ubonge bonke abamvotele. Ubonge nomndeni wakhe, uDavid Kau neKaya FM. “Loya mbhobho weKaya FM usungifundise okuningi futhi wavula neminyango eminingi.”
Ngokuwina umklomelo weComic of the Year, ulandele ezinyathelweni zikaTumi Morake owawuthola ngonyaka odlule noTrevor Noah.
USkhumba uhlale eqhulula amahlaya kwiKaya FM. Uphinde abe ngumethuli wezinhlelo zethelevishini njengoba ebethula olwezimoto kuMzansi Magic, iChange
noBoity Thulo futhi ulingisa emdlalweni wamahlaya wakuSABC 1, iThandeka’s Diary.