UPamela Nomvete nebuya kwiLockdown

UKHUZA ibuya ekulingiseni kwithelevishini yakuleli ngeLockdown kuMzansi Magic (DStv channel 161), uPamela Nomvete, owazakhela udumo kwiGenerations eminyakeni eyedlule. UPamela wayedlala indawo kaNtsiki Lukhele eminyakeni eyedlule, uzobonakala kwisizini yesibili yeLockdown edlala indawo kaGovernor Deborah Banda. Ufika nendodana yakhe uSimon Banda odlalwa nguThabo Rametsi. Ekhuluma neCity Press, uPamela uthe uDeborah akagayelwa mphako. Njengoba ebenyamalele yingoba ubelingisa e-United Kingdom. Ngo-2014 ukhiphe incwadi ethi Dancing the Beat of the Drum. “Ngiwine nendodo yomlingisi wesifazane ovelele kumaAfrican Oscars eLos Angeles eminyakeni emibili eyedlule ngendawo ebengiyidlala efilimini ebizwa ngeKingmakers,” ucashunwe kanje. Ngenyanga ezayo uzoqondisa ifilimu entsha angakayidaluli. Isizini yokuqala yalo mdlalo okhuluma ngempilo yasejele labesifazane iThabazimbi Women’s Correctional Service yaphela ujele uSharon Zulu (Lindiwe Ndlovu) eboshwa noGovernor Beauty (Slindile Nodangala) ekhishwa esikhundleni sakhe sokuba wumgcinimafa.

Omunye ozobonakala nguLinda Sebezo yena ozobe edlala indawo kaMaki Magwaza. UMaki uyisiboshwa esiyingozi eNingizimu Afrika esiphuma kwelinye ijele. Ufuna ukuziphindiselela kowesifazane owathatha indodana yakhe futhi wonke umuntu uzobona ukuthi kulula kuye ukugobhozisa igazi.

Laba balingisi bajoyina izilomo ezivele zidlala kulo mdlalo. Kuzona kukhona uTyson (Lorcia Cooper), Monde (Zola Nombona) noMazet (Dawn Thandeka King).

UMazet uzobuyela eThabazimbi ngemuva kokuphuma isikhashana.

UReneilwe Sema onguMqondisi weziteshi zezinhlelo zobumnandi kwaM-Net uthe isizini yokuqala yeLockdown yayibheka impilo yabesifazane ababoshiwe nezingqinamba ababhekana nazo ukuze babone olunye usuku.

Uthe isizini yesibili izodalula izimfihlo zasejele, ithemba nobuhlungu obuziwa yiziboshwa. Isizini yesibili iqala ngo-Okthoba 9.