Elokubulawa kukaChillies ludluliselwe kwi-Ipid
SELIDLULISELWE ophikweni oluphenya ngamacala athinta amaphoyisa i-Ipid idokodo lokubulawa kukaMnuz Sandile “Chillies” Bhengu waseMlaza obefihlwa ngempelasonto.
Izolo, Isolezwe lithole ukuthi idokodo lidluliselwe kubaphenyi balolu phiko ukuba bacubungule okwenzeka ngelanga adutshulwa ngalo.
Okhulumela i-Ipid, uMnuz Moses Dlamini, ukuqinisekisile ukuthi idokodo selikubo.
“Sizophenya. Wonke amacala asuke ethinta amaphoyisa, kukhona oshonile alethwa kithina bese siyabheka ukuthi lokho okusuke kushiwo amaphoyisa kuyahambisana yini nokwenzekile. Uma bethi umufi usuke ewadubula noma ephethe isibhamu, sisebenzisa nobuchwepheshe ukubheka ukuthi bukhona yini ubufakazi balokho okusuke kushiwo amaphoyisa,” kusho uDlamini.
NgoMgqibelo ebusuku emuva komgcwabo kaBhengu, amaphoyisa abophe amadoda amabili eMlaza ngecala lokuzama ukubulala amaphoyisa.
Amadoda, amagama awo angakadalulwa kuze kube avela enkantolo, namhlanje kuvele ukuthi atholwe nezibhamu ezimbili ezingekho emthethweni eMlaza ka-J ebhace ehlathini.
Kusolakala ukuthi bebephakathi kwabantu abebehambele umgcwabo kaBhengu okuthiwa ubeyisigebengu esaziwayo.
Okhulumela amaphoyisa KwaZulu-Natal, uColonel Thembeka Mbhele, uthe amadoda azovela enkantolo namhlanje. “Ebusuku ngoMgqibelo abasolwa badubule amaphoyisa maqede babaleka. Bajahwa ngamaphoyisa baze batholwa khona eMlaza sebecashile. Baboshelwe icala lokuzama ukubulala nelokutholwa nezibhamu ezingekho emthethweni,” kusho uMbhele.
Emngcwabeni obunguMgqibelo ehholo lomphakathi kwa-M eMlaza amaphoyisa athe abophe amadoda amabili abezenza abantu abangebona. Enye ibifake umfaniswano wamaphoyisa omgwaqo iTRT nenye ifake oweSA Navy.
Amadoda amathathu aboshwe ngoLwesihlanu azobhekana necala lokuzama ukubulala nokushayela budedengu. Kuthiwa azama ukushayisa iphoyisa elaliwamisa ngesikhathi beshaya izidudla kwa-V. Baphinde batholwa nensangu.
Bonke ababoshiwe kulindeleke ukuthi bavele enkantolo namuhla.