Lusenkantolo olwabazali abamise ukufunda
SELUDLULISELWE enkantolo udaba lwabazali abamise ukufunda ngoba befuna kuqashwe uthishomkhulu oyiKhaladi, eWentworth.
Kusuka ngoJulayi 26 izingane azifundi e-Assegai Primary kwazise abazali bavuka umbhejazane emuva kokuqashwa kukathishomkhulu omnyama.
Abazali abangathandanga ukudalulwa amagama bathe akusizo zodwa izingane zamaKhaladi ezifunda e-Assegai zikhona nezihlala eMlaza osekuphele inyanga namasonto amabili zingafundi.
UMnuz Sihle Mlotshwa obhekelele ezokuxhumana eMnyangweni wezeMfundo KwaZulu-Natal uthe benza konke okusemandleni ukuqinisekisa ukuthi ukufunda nokufundisa kuyaqhubeka e-Assegai Primary.
“Udaba lokuphazanyiswa kokufunda e-Assegai Primary silufake enkantolo ngoba uthishomkhulu uqashwe ngendlela efanele, ngeziqu anazo nangokuphasa inhlolokhono. Isigungu sabazali sasiyingxenye yethimba elalimphosa imibuzo futhi senelisekile ngendlela aphendule ngayo ngakho asazi kungani sekunemibhikisho manje,” kusho uMlotshwa.
Uthembise abazali ukuthi bazokwenza konke okusemandleni ukuqinisekisa ukuthi izingane zibuyela esikoleni.
“Namhlanje (ngeSonto) bekunomhlangano wokuzama ukuthola isixazululo kulolu daba. Senza konke okusemandleni ukuqinisekisa ukuthi isimo sibuyela kwesijwayelekile. Umnyango awuqashi ngokobuhlanga kodwa uqasha ngokwamava neziqu umuntu anazo,” kusho uMlotshwa.
Ugqugquzele abazali ukuthi bangaphazamisi ukufunda uma kukhona abangeneme ngakho kodwa bakhulume nezikhulu zomnyango ngoba imfundo yezingane ibalulekile.