Kushiswe amahhovisi ophiko lwamalayisensi
KUSHISWE amahhovisi ophiko olikhipha amalayisensi kwamasipala waKwaHlabisa, phakathi kwamabili, izolo.
Kuthiwa onogada abebeqaphile ebusuku bezwe kuphahlazeka ifastela kwathi besabheka ukuthi ngabe kwenzenjani babona sekugqamuka ilangabi lomlilo kwaqhuma nesibhamu.
Amadoda amabili abehlomile kuthiwa abaqhamukele ngemuva ababamba abavalela kwelinye igumbi elikuwo la mahhovisi abakhiyela.
UMnuz Velenkosini Hlabisa oyimeya kumasipala kwaHlabisa uthe basalinde ukuthi bathole umbiko ngokuthi kwenzekeni kulesi sikhungo.
Uthe batshelwe ukuthi kunamadoda amabili abambe onogada abavalela kwelinye igumbi ngemuva kokuthungela ngomlilo ihhovisi.
“Kusiphethe kabi ukuthi kunabantu abangashisa amahhovisi asiza umphakathi. Lokhu kuzowiphindisela ekuhluphekeni kokuthi kulo masipala singabi nalo ihhovisi elikhipha amalayisensi okushayela,” kusho yena.
Uqhube wathi umphakathi obunezinto okumele uzilande kuleli hhovisi ungakhathazeki ngoba ulwazi lugcinwa kumakhompyutha.
“Uma sesithole umbiko ophelele, sizowazisa umphakathi ukuthi izinto zawo obuzozilanda uzozithola kuphi futhi kuzothatha isikhathi esingakanani,” kusho yena.
Okhulumela uMnyango wezokuThutha KwaZulu-Natal, uMnuz Kwanele Ncalane uthe bebengakawutholi umbiko ogcwele ngokwenzeke kulesi sikhungo.
“Siyanxusa ukuthi uma kunomuntu onesikhalo ngokuthile ngalesi sikhungo kumele udaba lwakhe aluxazulule ngendlela eyiyo hhayi ukushisa isikhungo esisiza umphakathi wonke,” kusho yena.
UColonel Thembeka Mbhele okhulumela amaphoyisa ukuqinisekisile ukuthi amahhovisi ashisiwe wathi kuphenywa icala lokucekela phansi impahla.