Akafikanga ecaleni uKhoza we-ANC
SIHLEHLISELWE isonto elizayo isithangami sokuqondiswa ubugwegwe kwelungu le-ANC eselizakhele udumo ngokusho esidlangaleni lokho elikholelwa kukho, uDkt Makhosi Khoza, njengoba izolo egcine engafikanga lapho ebebizelwe khona.
Isithangami sihlehliselwe iSonto emahhovisi e-ANC KwaZuluNatal.
Izolo, umkhulumeli we-ANC esifundazweni, uMnuz Mdumiseni Khoza uthe yize kungesiyo inqubomgomo ye-ANC ukuphumela obala ngokudingidwa esithangamini sokuqondiswa ubugwegwe kodwa babone kufanele ukuthi balukhulume esidlangaleni udaba lukaDkt Khoza.
“Sibone kufanele ukuthi sikhulume nabezindaba ngoba uDkt Khoza uyathanda ukubhala ku-facebook. UDkt Khoza akafikanga ngo-9 ekuseni njengoba ebeyalelwe yi-ANC kodwa kufike ummeli wakhe uMnuz Smanga Sethene othe utshelwe izolo (ngoMgqibelo) ukuthi uzomela uDkt Khoza. Ucele ukuthi icala lihlehle ukuze athole isikhathi sokuzilungiselela,” kusho uNtuli.
Uthe uDkt Khoza uzwakalise ukuthi usaba ukusocongwa kodwa lokhu bekuyinto engekho ngoba ubetsheliwe ukuthi zizoqina ezokuphepha.
“Besiwenze kahle amalungiselelo ezokuphepha. Abukho ubufakazi obubambekayo obukhombisa ukuthi ubengaphephile uma eza esigungwini sokuqondisa ubugwegwe,” kusho uNtuli.
Uchaze isigungu esiqondisa ubugwegwe ngokuthi siwenza kahle umsebenzi ngaphandle kokukhetha iphela emasini.
“Silindele ukuthi abuye ngeSonto elizayo ehambisana nommeli wakhe. Unelungelo lokuhlangana nethimba le-ANC elethula ubufakazi ukuze akwazi ukuthola akudingayo ukuzilungiselela icala. Akaxoshiwe uDkt Khoza kodwa silandela imithetho yombutho yokuqondisa labo ababuye bagwegwe,” kusho uNtuli. UDkt Khoza ubhale ekhasini lakhe ku-facebook ukuthi onyakeni wokuhlonipha iqhaza elabanjwa wu-OR Tambo kungani kufanele ashushiswe.
Uthe i-ANC inake izindaba ezingaliyisi phambili izwe kunokulithuthukisa. “Ngangena kwi-ANC ngimncane ngenxa yothando enginalo lwabantu bakuleli. I-ANC kufanele ithuthukise izingane zethu, izigqugquzele ukuthi zifunde izibalo, ulimi lwebele kanjalo nesilungu. Ngiphatheka kabi uma ngibuka isimo namhlanje, ngivele ngibone ukuthi ukube uMagaqa (Sindiso) wahamba noMalema (waqala i-EFF) ngabe usaphila. Kuyingozi ukuba yilungu le-ANC uma ungahambisani nenkohlakalo. Labo abakhohlakele bafuna ushushiswe,” kusho uDkt Khoza.
Ubuze ukuthi kungani uMnuz Senzo Mchunu wasuswa esikhundleni sokuba ngundunankulu, wathi yingoba wayengazwani nenkohlakalo, naye ushushiswa ngoba uzonda inkohlakalo.